Sabirabadda kartof yığımı yekunlaşmaq üzrədir
Sabirabad, 22 iyul, Mahir Babayev, AZƏRTAC
Sabirabadda kartof yığımı yekunlaşmaq üzrədir. Məhsul istehsalçıları bu günədək 1350 hektar kartof sahəsindən məhsul toplayıblar ki, bu da ümumi kartof sahəsinin 98.2 faizini təşkil edir.
Rayon Statistika İdarəsindən AZƏRTAC-ın bölgə müxbirinə bildiriblər ki, sabirabadlı əkinçilər erkən yazda 1374 hektar sahədə kartof əkiblər. Bitkiyə nümunəvi qulluq göstərildiyindən sahələrdə bol məhsul yetişib. Yığıma mütəşəkkil başlayan torpaq mülkiyyətçiləri qısa müddətdə 1350 hektar sahədən 19 min 021.5 ton kartof toplayıblar ki, bu da ötən ilin müvafiq dövrü ilə müqayisədə 12.5 ton çoxdur. Məhsulu yığılmış hər hektar sahədən 140.8 sentner kartof əldə olunub.
Tədarük olunan kartofun demək olar ki, 80-85 faizi rayonun Qasımbəyli kəndində fəaliyyət göstərən torpaq sahibkarları tərəfindən toplanılıb. Rayonda məhsul yığımı yaxın günlərdə başa çatacaq.
Rayonun Qasımbəyli kənd sakini Rubin Rəhimov bu il 2.5 hektar sahədə kartof becərib. Artıq yığımı başa çatdırdığını deyən məhsul istehsalçısı qeyd edib ki, hər hektar sahədən 140.9 sentner məhsul götürməklə 37 ton kartof toplayıb. O, məhsuldan hər il yaxşı mənfəət götürdüyündən növbəti ilə əkin sahəsini genişləndirərək 3 hektara çatdırmaq niyyətində olduğunu bildirib.
Bölmənin digər xəbərləri
