Şabran və Xaçmaz sakinlərinin ailə, qadın, uşaq məsələləri ilə bağlı müraciətləri dinlənilib
Bakı, 26 yanvar, AZƏRTAC
Yanvarın 26-da Ailə, Qadın və Uşaq Problemləri üzrə Dövlət Komitəsinin sədri Bahar Muradova Şabran rayonunda vətəndaşlarla görüşüb.
Komitədən AZƏRTAC-a bildiriblər ki, əvvəlcə Ümummilli Lider Heydər Əliyevin abidəsi ziyarət olunub, əziz xatirəsi ehtiramla yad edilib.
Şabran rayon Heydər Əliyev Mərkəzində keçirilən görüşdə Şabran və Xaçmaz rayonundan olan vətəndaşların ərizə və şikayətlərinə baxılıb.
Müraciət mövzuları qəyyumluğa götürülmə, mənzil şəraitinin yaxşılaşdırılması, işlə təmin olunma, alimentin ödənilməməsi və digər məsələlərlə bağlı olub. Qurumun fəaliyyət istiqamətlərinə uyğun olan müraciətlərin həlli ilə bağlı tədbirlər görülüb, həlli araşdırma tələb edən məsələlərlə bağlı yazılı müraciət qeydə alınaraq aidiyyəti şöbələrin icraatına göndərilib.
Qeyd edək ki, görüş mərkəzi icra hakimiyyəti orqanları və digər idarəetmə qurumlarının rəhbərlərinin şəhər və rayonlarda vətəndaşların qəbulu cədvəlinə əsasən keçirilib.
Bölmənin digər xəbərləri
