SABUNÇU RAYONU QADINLARININ KONFRANSI KEÇİRİLMİŞDİR
AZƏRTAC xəbər verir ki, sentyabrın 2-də Azərbaycan qadınlarının III qurultayına hazırlıq çərçivəsində Sabunçu rayonu qadınlarının konfransı keçirilmişdir.
Konfrans iştirakçıları əvvəlcə ümummilli lider Heydər Əliyevin rayon icra hakimiyyətinin binasındakı abidəsi önünə gül dəstələri düzmüşlər.
Sabunçu Rayon İcra Hakimiyyətinin başçısı Əlibala Əliyev son illər respublikada gender bərabərliyinin təmin edilməsi və qadınların imkanlarının genişləndirilməsi istiqamətində mühüm addımlar atıldığını qeyd etmişdir.
Ölkədə qadın məsələlərinin həlli istiqamətində görülən işlər barədə məlumat verən Ailə, Qadın və Uşaq Problemləri üzrə Dövlət Komitəsinin sədri Hicran Hüseynova bildirmişdir ki, Sabunçu rayonu qadınların yüksək fəallığı ilə fərqlənir. Son məlumata görə, bu rayonda rəhbər vəzifələrdə 117 nəfər qadın çalışır. Gələcəkdə bu rəqəmin daha da artırılması, təşəbbüskar qadınların irəli çəkilməsi zəruridir. Bununla yanaşı, qadın sahibkarlar üçün daha əlverişli mühitin formalaşdırılması istiqamətində əməli addımlar atılmalıdır.
RİH başçısının müavini Cəmilə Ramazanova rayonda 2003-2008-ci illər ərzində qadınların problemlərinin həlli istiqamətində görülmüş işlər barədə məruzə etmişdir.
Tədbirdə məruzə ətrafında çıxışlar dinlənilmişdir.
Konfransda Azərbaycan qadınlarının III qurultayına nümayəndələr seçilmiş, Ağbirçəklər Şurası yaradılmışdır.
Bölmənin digər xəbərləri
