Şahmatçımız “Aeroflot open” turnirində inamlı mübarizəsini davam etdirir
Bakı, 27 fevral, AZƏRTAC
Fevralın 27-də Moskvada ənənəvi “Aeroflot open” şahmat turnirinin son turuna start veriləcək.
AZƏRTAC xəbər verir ki, turnirdə A qrupunda mübarizə aparan şahmatçımız Rauf Məmmədov səkkizinci turda ispaniyalı Ruiz Miguel Santos ilə heç-heçə edib. Eltac Səfərli isə Özbəkistan təmsilçisi Nodirbek Abdusattorova uduzub. R.Məmmədov sonuncu turda hindistanlı Babu Lalit, E.Səfərli isə iranlı Amirreza Purramezanali ilə qarşılaşacaqlar. Hazırda R.Məmmədovun 4, E.Səfərlinin 3,5 xalı var.
B qrupunda mübarizə aparan şahmatçılarımız uğurlu çıxışları ilə seçilirlər. Bu qrupda inamlı oyunu ilə seçilən 15 yaşlı Azərbaycan çempionu Məhəmməd Muradlı səkkizinci turda rusiyalı Sergey Drıqalov ilə heç-heçə edib. Yarım xal itirməsinə baxmayaraq, M.Muradlı mükafatçılar sırasına düşmək uğrunda mübarizəni inamla davam etdirir. Aktivində 6 xal olan şahmatçımız hazırda turnir cədvəlində 2-5-ci yerləri bölüşür.
Digər şahmatçımız Vüqar Əsədli də turnirdə inamla mübarizə aparır. Səkkiz turdan sonra 5,5 xal toplayan V. Əsədli 6-16-cı yerləri bölüşür.
Turnirdə Aydın Süleymanlının 5, Xanım Balacayevanın 4, Read Səmədovun 3, Ülviyyə Fətəliyevanın 2 xalı var.
Bölmənin digər xəbərləri
