SALYANIN ZƏMİLƏRİNƏ 45 KOMBAYN ÇIXARILMIŞDIR
Salyan, 13 iyun (AZƏRTAC). Salyan rayonunun taxıl yetişdirən sahibkarları arpa zəmilərinə 45 kombayn, 70 qoşqulu traktor və yükünüözüboşaldan 3 maşın çıxarmışlar. Az müddətdə 1380 tondan artıq arpa biçilib döyülmüşdür. Hər hektarın orta məhsuldarlığı 30 sentnerdir. Bu? rayonun arpa sahələri üçün məqbul məhsuldarlıq göstəricisi sayılır. Daha 7500 hektar arpa zəmizisinin məhsulu da yığılacaqdır.
Rayonda cari ilin məhsulu üçün 18 min 734 hektar sahədə taxıl yetişdirilmişdir. Bu, əvvəlki illə müqayisədə 7626 hektar çoxdur. Mütəxəssislər azı 60 min ton məhsul yığılacağını proqnozlaşdırırlar. Rayonda zəmi-xırman konveyerinin ahəngdar işləməsi üçün zəruri təşkilati-texniki tədbirlər vaxtında görülmüşdür. Mövsüm ərzində işlədilməsi nəzərdə tutulan 60-a yaxın kombayn və 80-dən artıq yükdaşıma texnikası vaxtında təmir edilmişdir. Bu mövsümdə biçində "Aqrolizinq" Açıq Səhmdar Cəmiyyəti xəttilə alınmış yüksək iş qabiliyyəti olan 10 kombayndan istifadə olunur. Rayon icra hakimiyyətində biçin məsələləri üzrə mütəxəssislərdən ibarət qərargah çalışır. Ortaya çıxan problemlərin operativ həlli təmin edilir. Məqsəd biçini optimal müddətdə həyata keçirməklə məhsul itkisinə yol verməməkdir.
Bölmənin digər xəbərləri
