ŞAMAXI RAYONU İCTİMAİYYƏTİNİN NÜMAYƏNDƏLƏRİ İLƏ GÖRÜŞDƏ AZƏRBAYCAN PREZİDENTİ İLHAM ƏLİYEVİN NİTQİ
 |
 |
-Əziz şamaxılılar!
Əziz bacılar və qardaşlar!
Bu gün çox əlamətdar bir gündür. Şamaxı rayonunda yeni Müalicə-Diaqnostika Mərkəzinin təməlini qoyduq. Əminəm ki, qısa müddət ərzində burada çox gözəl bir tibb ocağı tikiləcək və şamaxılıların istifadəsinə veriləcəkdir. Burada ən yüksək dünya standartlarına uyğun müasir avadanlıqlar olacaq, diaqnostika, müalicə və müayinə üçün hər cür şərait yaradılacaqdır. Bu, bir də onu göstərir ki, Azərbaycanda çox güclü sosial siyasət aparılır.
Bildiyiniz kimi, ölkəmizin müxtəlif rayonlarında yeni, müasir xəstəxanalar tikilir. Artıq Lənkəranda və Naxçıvanda bu xəstəxanalar fəaliyyətə başlamışdır və orada çox yüksək tibbi xidmət var. Başqa şəhər və rayonlarda da eyni tibb ocaqları tikilir. Bu gün Şamaxıda təməlini qoyduğumuz xəstəxana, əlbəttə ki, ən yüksək səviyyədə tikilib istifadəyə veriləcəkdir. Bütün bunları biz indi həyata keçiririk, imkanlarımız artır, ulu öndər Heydər Əliyevin təşəbbüsü ilə başlanmış Azərbaycanın neft strategiyası nəticəsində bütün bunlar mümkün olur. Çünki bütün bu yeni xəstəxanalar və diaqnostika-müalicə mərkəzləri Neft Şirkətinin hesabına tikilir. Əgər 1994-cü ildə biz xarici neft şirkətləri ilə əməkdaşlığa başlamasaydıq, bu gün bunları etmək qeyri-mümkün olacaqdı. Bu onu göstərir ki, Azərbaycan nefti, Azərbaycanın təbii sərvətləri insanların rifah halının yaxşılaşmasında öz rolunu oynayır. Bizim güclü sosial siyasətimizin də əsas məqsədi ondan ibarətdir ki, Azərbaycan xalqı daha da yaxşı, daha da firavan yaşasın, bunun üçün lazım olan bütün infrastruktur obyektləri tikilib istifadəyə verilsin, özü də yüksək səviyyədə. Ona görə, bildiyiniz kimi, xəstəxana, məktəb tikintisi Azərbaycanda çox geniş vüsət alıbdır və biz bu siyasəti bundan sonra da davam etdirəcəyik. Bizim maddi imkanlarımız artır. Keçən il Bakı-Tbilisi-Ceyhan neft kəmərinin işə düşməsi nəticəsində Azərbaycana çox böyük həcmdə valyuta axını başlamışdır. Bizim də düşünülmüş proqramlarımız var, bütün istiqamətlər üzrə fəaliyyət planımız var və bunları həyata keçiririk.
Bir müddət bundan əvvəl Şamaxıda çox müasir Olimpiya İdman Kompleksi də tikilmişdir. Bu gün xəstəxananın təməli qoyuldu və Şamaxı rayonunun bütövlükdə inkişafına da böyük diqqət göstərilir. Şamaxı çox gözəl rayondur və Azərbaycanın qədim torpağıdır. Mən çox istəyirəm ki, burada quruculuq-abadlıq işləri daha da sürətlə getsin. Artıq televizor istehsalı zavodu istifadəyə verilmişdir. Burada məişət malları istehsalı zavodu da tikilir. Digər iş yerləri üçün lazım olan infrastruktur və sənaye müəssisələri də tikilməlidir. Çünki iş yerləri çox olan halda, əlbəttə ki, insanların həyat səviyyəsi də yaxşılaşır. Regionların sosial-iqtisadi inkişafı proqramı da bu məqsədi güdür. Bu ilin fevral ayında biz proqramın üçilliyini qeyd elədik, çox geniş müzakirələr, təhlillər aparıldı və gördük ki, bu son üç il ərzində proqramın icrası nəticəsində çox böyük işlər görülmüşdür.
Demək olar ki, ölkəmizin hər bir yerində yenilik var. Yeni müəssisələr, fabriklər, yollar, infrastruktur obyektləri, elektrik stansiyaları, bütün bunlar ölkəmizi gücləndirir. Əgər hər bir rayon iqtisadi cəhətdən güclü olarsa, onda ölkəmiz də güclənər. Buna da bütün imkanlar var.
Bir daha demək istəyirəm ki, Azərbaycan nefti, Azərbaycanın təbii sərvətləri Azərbaycan xalqının xidmətindədir və bu, əsas məqsəddir. Biz bu layihələri başlayanda da məhz bu məqsədi rəhbər tutmuşduq. Çünki əsas məqsəd bütün bu imkanları səfərbər edib insanların daha da yaxşı yaşamasını təmin etməkdir. Bu məqsədlə maaşlar da, pensiyalar da artırılır. Bildiyiniz kimi, bu yaxınlarda minimum əmək haqqı da artırılmışdır. Büdcədən maliyyələşən təşkilatlarda işləyən insanların əmək haqları artırılmışdır. Bu siyasət ardıcıl şəkildə aparılır. Neçə illərdir maaşlar, pensiyalar ildə ən azı iki dəfə artırılır və gələcəkdə də biz bunu edəcəyik. Gələcəkdə bizim imkanlarımız daha da geniş, daha da böyük olacaqdır. Ona görə sosial məsələlərin həllinə daha da böyük diqqət göstəriləcəkdir.
Bütövlükdə səhiyyə sisteminin inkişafına böyük diqqət göstərilir, yeni xəstəxanalar tikilir. Bildiyiniz kimi, bu yaxınlarda təcili tibbi yardım maşınlarının alınması üçün Prezidentin ehtiyat fondundan vəsait ayrılıbdır. Ən müasir standartlara cavab verən avadanlıqlar gətiriləcəkdir. Belə olan halda, bütün bu sosial məsələlər daha da asanlıqla öz həllini tapacaqdır.
Mən çox şadam ki, bu gün biz birlikdə bu mərkəzin təməlini qoyduq. Əminəm ki, qısa müddət ərzində, maksimum bir il ərzində biz yenə də burada görüşəcək və gözəl xəstəxananın - Müalicə-Diaqnostika Mərkəzinin açılışını qeyd edəcəyik. Bundan sonra da belə açılışlar çox olacaqdır. Biz regionların sosial-iqtisadi inkişafına bundan sonra da böyük vəsait ayıracağıq. Bizim büdcə gəlirlərimiz ildən-ilə artır və bildiyiniz kimi, büdcə gəlirlərinin əsas hissəsi həm infrastruktur layihələrinə, həm də sosial məsələlərin həllinə yönəldilibdir. Belə olan halda, ölkəmiz hərtərəfli inkişaf edəcəkdir.
Biz neft amilindən çox məharətlə istifadə edirik və Azərbaycan da böyük həcmdə neft hasil edən ölkəyə çevrilir. Azərbaycanın beynəlxalq önəmi artır və biz regional çərçivədə daha da fəal rol oynayırıq. Bizim təşəbbüsümüzlə həyata keçirilən transmilli layihələr həm ölkəmizin iqtisadiyyatını gücləndirir, həm də beynəlxalq imicini, önəmini artırır. Belə olan halda, bütün məsələlər daha da asanlıqla öz həllini tapacaqdır. Həm xarici siyasətdə, həm daxili siyasətdə, həm iqtisadi inkişafda, regionların sosial-iqtisadi inkişafında, müxtəlif sosial məsələlərin həllində - təhsil, səhiyyə, mədəniyyət, ekologiyada, bütün sahələrdə proqramlar var və bunlar ardıcıllıqla icra olunur. Mən şübhə etmirəm ki, yaxın zamanlarda Azərbaycan çox zəngin ölkəyə çevriləcək, Azərbaycan vətəndaşları daha da yaxşı yaşayacaqlar. Mənim məqsədim budur! Mən istəyirəm ki, hər bir insan yaxşı yaşasın, hər bir insanın maddi imkanları artsın, uşaqlar yaxşı məktəblərdə oxusunlar, müəllimlər yaxşı məktəblərdə dərs desinlər. Həkimlər gözəl xəstəxanalarda işləsinlər və insanlarımız da sağlam olsunlar. Sağlam olmaq üçün, əlbəttə ki, hər bir insan vaxtaşırı tibbi müayinədən keçməlidir. Bunu da biz Azərbaycanda tətbiq edəcəyik. Mən sizə onu da deyə bilərəm ki, yeni xəstəxanaların tikintisi məhz Azərbaycanın rayonlarından başlanmışdır.
Bizim istədiyimiz də odur ki, rayonlarda tibbi xidmət güclənsin. Çünki Bakıda və böyük şəhərlərdə bu, var, düzdür, bizi tam qane etmir, amma var. Lakin, ilk növbədə, rayonlarda yaşayan insanların sağlamlığı bizim üçün vacibdir, çünki rayonlarda səhiyyənin səviyyəsi çox aşağıdır. İndi hər bir bölgədə artıq bu işlər gedir və gələcəkdə isə biz hər bir rayonda da bunlara nail olacağıq.
Əziz dostlar, mən sizi bir daha ürəkdən salamlayıram. Şamaxıda olmağımdan çox məmnunam. Mən Şamaxıda dəfələrlə olmuşam və həmişə şamaxılıların dəstəyini hiss etmişəm. Bu dəstək mənə güc verir və buna əsaslanaraq, öz işimi davam etdirirəm. Prezident kimi üzərimə götürdüyüm bütün öhdəlikləri yerinə yetirirəm və xalq qarşısında vaxtaşırı hesabat verirəm. Görülən işlər də göz qabağındadır. Düzdür, problemlər də, həll olunmamış məsələlər də var. Amma biz bunların həlli yollarını bilirik, bunları həll edirik və sizin dəstəyinizlə bundan sonra da edəcəyik.
Mən sizin hamınıza ürəkdən cansağlığı arzu edirəm. Arzu edirəm ki, siz xəstələnməyəsiniz, amma işdi, əgər xəstələnsəniz, onu da bilin ki, bir ildən sonra burada ən yüksək tibbi xidmət almaq mümkün olacaqdır. Sağ olun, sizə uğurlar, cansağlığı arzulayıram.
(Dövlətimizin başçısının nitqi diqqətlə dinlənildi və alqışlarla qarşılandı).
Bölmənin digər xəbərləri
