REGİONLAR
ŞAMAXI XƏBƏRLƏRİ
Son vaxtlar Şamaxıda abadlıq-tikinti işlərinə diqqət xeyli artmışdır. Yerli bələdiyyə də bu sahədə öz imkanlarından istifadə edir. Yeni yaradılmış təmir-tikinti qrupunun köməyi ilə parklarda fəvvarələr təmir edilmiş, iki yüz metr su borusu çəkilmiş, səksənə yaxın oturacaq quraşdırılmışdır. Yeddi günbəz qəbiristanı və şəhidlər xiyabanı hasara alınmış, çığırlara asfalt döşənmişdir.
Yeni iş yerlərinin açılması üçün də tədbirlər görülür. İndiyədək 25 nəfər işlə təmin olunmuşdur. Toxuculq sexi, yeni bazar açmaq nəzərdə tutulur.
Uşaq və gənclərin idmana cəlb olunmasına da diqqət yetirilir. Olimpiya ümidləri klubunun yeni yaradılmış cüdo, sambo, sərbəst və yunan-Roma güləşləri bölmələrində xeyli gənc məşğul olur.
X X X
Rayon mərkəzi xəstəxanasında əhaliyə pullu xidmət göstərilməsindən əldə edilən vəsait hesabına müasir tibb avadanlığı alınmış, zəruri təmir işləri aparılmışdır. Müalicə imkanlarının artması qonşu rayonlardan gələn xəstələrin də qəbul olunmasına şərait yaradır. Daha ağır xəstələr müqavilə əsasında respublikanın mərkəzi klinik xəstəxanalarına göndərilir. Rayonun səhiyyə obyektlərinə BMT Uşaq Fondunun Azərbaycan nümayəndəliyi də kömək göstərir.