Səbinə Cabarova: Bu çətin günlərdə könüllülər öz missiyalarını layiqincə yerinə yetirirlər
Bakı, 18 aprel, AZƏRTAC
"ASAN xidmət" mərkəzi fəaliyyətə başladığı gündən etibarən orada könüllülər fəaliyyət göstərirlər. Bu günə qədər könüllülərimiz tərəfindən yüzlərlə layihə icra olunub. Həyata keçirdiyimiz layihələrin məqsədi gənclərə dövlətçilik, vətənpərvərlik dəyərlərini aşılamaqdır. Bu gün də onun nəticəsidir ki, ölkəmizdə belə vətənpərvər gənclər yetişirlər. Bu ilin Prezident İlham Əliyev tərəfindən "Könüllülər ili" elan olunması gəncləri, ən əsas da könüllüləri çox sevindirdi. Lakin dünyanı cənginə alan koronavirus bəlasının ölkəmizdə də aşkarlanması hər kəsi məyus etdi. Buna baxmayaraq, hökumətin həyata keçirdiyi koronavirusla mübarizə tədbirlərində könüllülər fəal iştirak edir, öz missiyalarını layiqincə yerinə yetirirlər. Bu da onu göstərir ki, bu il əbəs yerə "Könüllülər ili" elan olunmayıb.
Bu sözləri AZƏRTAC-a müsahibəsində “ASAN Könüllüləri” Təşkilatının sədri Səbinə Cabarova deyib.
"Mən xüsusi vurğulamaq istərdim ki, COVID-19 virusunun ölkəmizdə aşkarlandığı gündən etibarən ASAN könüllüləri də onunla mübarizəyə qoşulublar. Belə ki, könüllülərimiz martın 16-dan etibarən "Tibbi Ərazi Bölmələrinin İdarəetmə Birliyi” (TƏBİB) publik hüquqi şəxs ilə birlikdə Heydər Əliyev Beynəlxalq Aeroportunda vətəndaşlarımıza xidmət göstərirlər. Onlar xaricdən gələn vətəndaşlarımızın qarşılanması, axının tənzimlənməsi, məlumatladırma, tibbi ehtiyaclar - su, əlcək, maska ilə təminolunma və s. kimi işləri görürlər. Könüllülər zəruri tibbi mühafizə geyimləri və vasitələri ilə təmin olunublar. Eyni zamanda, şimal bölgəsində də, yəni Qubada TƏBİB-in qərargahında “ASAN Könüllüləri” Təşkilatının nümayəndəsi fəaliyyət göstərir. Hazırda da bir qrup ASAN könüllüsü hava limanındadır.
Bildiyimiz kimi, Nazirlər Kabineti yanında Operativ Qərargah tərəfindən martın 24-dən etibarən xüsusi karantin rejimi elan olunub və bununla əlaqədar yaşı 65-dən yuxarı olan vətəndaşlar evdə qalmaq məcburiyyətindədirlər. Lakin ASAN könüllüləri həmin vətəndaşlara biganə yanaşmadı və "ASAN məktub" sosial proqramı çərçivəsində onlara xidmət etməyə başladılar. Layihə çərçivəsində könüllülərimiz tərəfindən yaşı 65-dən yuxarı olan tənha vətəndaşların müraciətləri qəbul olunaraq www.asanmektub.az saytına yerləşdirilir. Müraciətlər daha çox gündəlik ərzaq tələbatları, dərmanlar və s. ilə bağlıdır. Daha sonra vətəndaşlar sayta daxil olmaqla məktubları öhdəliyə götürür, müraciətdə qeyd olunanları alır və onları könüllülərimizə təhvil verirlər. Son olaraq könüllülərimiz tərəfindən həmin məhsullar müraciət sahiblərinə çatdırılır. Qeyd edim ki, martın 27-dən etibarən 550-dən çox tənha yaşlının müraciəti çatdırılıb", - deyə S.Cabarova bildirib.
Təşkilatın sədrinin sözlərinə görə onlar bu tədbirləri həyata keçirdikləri zaman hər kəsi həmrəy olmağa, bu çətin günlərdə xeyirxah təşəbbüslərə qoşulmağa səsləyirlər: "Bizim səsimizə digər qurumlar da səs verdi. Çağırışımıza səs verən qurumlardan biri də "Coca-Cola Azərbaycan" şirkətidir. Belə ki, "Coca-Cola Azərbaycan" şirkəti və “ASAN Könüllüləri” Təşkilatının növbəti əməkdaşlığı çərçivəsində Bakı şəhəri və bölgələrdə karantin rejimində fəaliyyət göstərən xəstəxanalara ödənişsiz formada içməli sular çatdırılıb. Xəstəxanalarda çalışan tibbi personal və karantin rejimində olanların su tələbatını ödəmək üçün 120 min vahid “Bonaqua” suları könüllülərin iştirakı ilə ünvanlara göndərilib.
Müxtəlif qurumlarla əməkdaşlıq çərçivəsində həyata keçirilən tədbirlərdən biri ASAN könüllülərinin Əmək və Əhalinin Sosial Müdafiəsi Nazirliyi ilə də birgə yaşlıların ehtiyaclarını təmin etməsidir.
“ASAN Könüllüləri” Təşkilatının da həmtəsisçisi olduğu Azərbaycan könüllülərinin əlaqələndirmə mərkəzi çərçivəsində “Könüllü qonşu”, “Könüllü donor” layihələri həyata keçirilir. Keçirilən tədbirlərdə ASAN könüllüləri Bakı və regionlarda fəal iştirak edirlər. Könüllülərimiz "Könüllü donor" aksiyası çərçivəsində həm qanvermə, həm də donorların məlumatlandırılması və yönləndirilməsi prosesində də fəal iştirak edirlər".
S.Cabarova bildirib ki, Ümumdünya Səhiyyə Təşkilatının həyata keçirdiyi "Təmiz Əllər" kampaniyasına ASAN könüllüləri də qoşulublar. Gənclər təşkilatları arasında ilk olaraq “ASAN Könüllüləri” Təşkilatı tərəfindən başladılan bu kampaniya estafet olaraq digər könüllü təşkilatlara ötürülüb.
Onun sözlərinə görə, karantin dövründə təhlükəli ərazilərdə fəaliyyət göstərən ASAN könüllülərinin öz təəssüratlarını bölüşməsi və digər gəncləri də ölkəmiz tərəfindən həyata keçirilən tədbirlərdə fəal iştiraka səsləmək məqsədilə sosial şəbəkələr üzərindən "#FədakarKönüllülərimiz" rubrikasına start verilib.
Bölmənin digər xəbərləri
