SEÇKİ KOMİSSİYALARI ÜÇÜN ƏLVERİŞLİ ŞƏRAİTİN YARADILMASI SEÇKİLƏRİN DEMOKRATİKLİYİNİN BAŞLICA ŞƏRTLƏRİNDƏN BİRİDİR
Mayın 16-da 11 saylı Qaradağ seçki dairəsi dairə seçki komissiyasının (DSK) yeni inzibati binası istifadəyə verilmişdir.
AZƏRTAC xəbər verir ki, bu münasibətlə keçirilən mərasimi dairə seçki komissiyasının sədri Azər Ələsgərov açaraq respublikamızın sosial-iqtisadi həyatında qazanılan nailiyyətlər fonunda demokratiya quruculuğunun da uğurla davam etdirildiyini vurğulamışdır. Qeyd etmişdir ki, demokratik cəmiyyəti, əsasən, demokratik seçkilər xarakterizə edir. Ölkəmizdə seçkilərin keçirilməsi ildən-ilə təkmilləşdirilir, bu prosesin şəffaflığı təmin olunur. Beynəlxalq tələblərə cavab verən seçkilərin keçirilməsi yaradılmış şəraitin səviyyəsindən çox asılıdır. Natiq məlumat vermişdir ki, Qaradağ Rayon İcra Hakimiyyətinin səyi ilə bina 3 ay ərzində tikilmiş, Mərkəzi Seçki Komissiyası (MSK) tərəfindən hər cür avadanlıqla təchiz edilmişdir.
Sədr başçılıq etdiyi komissiyanın üzvləri adından söz vermişdir ki, bundan sonra da seçkilərin demokratik və beynəlxalq tələblərə uyğun keçirilməsi üçün səylərini əsirgəməyəcəklər.
Qaradağ Rayon İcra Hakimiyyətinin başçısı Hüseyn İsrafilov respublikamızda seçki sisteminin təkmilləşdirilməsi, bu mühüm siyasi kampaniyanın keçirilməsində şəffaflığın təmin edilməsi, seçki komissiyalarının fəaliyyəti üçün əlverişli şəraitin yaradılması istiqamətində dövlətin atdığı addımlardan danışmışdır. O, əmin olduğunu bildirmişdir ki, dairə seçki komissiyası bundan sonra da seçkilərin yüksək səviyyədə keçirilməsinə nail olacaqdır.
Mərasimdə MSK-nın sədri Məzahir Pənahov çıxış edərək, ulu öndər Heydər Əliyevin ikinci dəfə hakimiyyətə gəldiyi 1993-cü ildən başlayaraq Azərbaycanda dünyəvi, sivil dövlət quruculuğu istiqamətində görülmüş işləri xatırlatmış, hazırda bu fəaliyyətin Prezident İlham Əliyev tərəfindən uğurla davam etdirildiyini vurğulamışdır. Demokratiyanın inkişafı, seçkilərin beynəlxalq standartlara uyğun, şəffaf keçirilməsi üçün ölkə rəhbərliyində siyasi iradənin olması, bunun dəfələrlə öz təsdiqini tapması, seçkilər ərəfəsində Prezidentin imzaladığı müvafiq sərəncamlar, verdiyi göstərişlər diqqətə çatdırılmışdır.
M.Pənahov məlumat vermişdir ki, Azərbaycanın Seçki Məcəlləsi beynəlxalq ekspertlər tərəfindən yüksək qiymətləndirilir və bu sənəd bir çox ölkələr üçün nümunə göstərilir.
Natiq ölkəmizdə yerli seçki komissiyalarının iş şəraitinin yaxşılaşdırılması məqsədi ilə 60-dan çox seçki dairəsi dairə seçki komissiyasının yeni inzibati bina və müasir texniki avadanlıqla təmin olunduğunu, 20-dən artıq DSK-nın yerləşdiyi binanın əsaslı təmir edildiyini, 10-15 dairədə şəraitin yaxşı olduğunu, qalanlarında isə otaqların sayının artırıldığını diqqətə çatdıraraq demişdir ki, bu, MDB məkanında bənzəri olmayan bir işdir. Belə bir genişmiqyaslı iş Prezident İlham Əliyevin tapşırığı və birbaşa nəzarəti ilə həyata keçirilir.
M.Pənahov bu diqqət və qayğıya görə MSK-nın rəhbərliyi, dairə seçki komissiyalarının kollektivləri adından dövlətimizin başçısı İlham Əliyevə dərin minnətdarlığını bildirmişdir.
MSK sədri M.Pənahov və rayon icra hakimiyyətinin başçısı H.İsrafilov açılışı bildirən qırmızı lenti kəsdikdən sonra 11 saylı Qaradağ seçki dairəsi dairə seçki komissiyası üçün inşa edilmiş yeni binaya baxış olmuşdur.
Burada qonaqlar 10 otaqdan, iclas zalından ibarət ikimərtəbəli yeni inzibati binanın texniki təchizatı ilə maraqlanmışlar.
Bölmənin digər xəbərləri
