Şəhid İlham Abbasovun xatirəsi anılıb
Füzuli, 17 noyabr, Aydın Yavərzadə, AZƏRTAC
44 günlük Vətən müharibəsinin şəhidi Abbasov İlham Əli oğlunun anım günündə məzarı ziyarət olunub.
AZƏRTAC-ın bölgə müxbiri xəbər verir ki, anım günündə şəhidin ailə üzvləri ilə bərabər Füzuli Rayon İcra Hakimiyyətinin əməkdaşları, Səfərbərlik və Hərbi Xidmətə Çağırış üzrə Dövlət Xidmətinin Füzuli rayon şöbəsinin nümayəndələri, təhsil və mədəniyyət işçiləri, döyüş yoldaşları, şəhid ailələri, qazilər və sakinlər iştirak ediblər.
Mərasimdə şəhid İlham Abbasovun həyatından və döyüş yolundan danışılıb. Bildirilib ki, əslən Füzuli rayonunun Dilağarda kəndindən olan İlham Abbasov 2000-ci ildə Biləsuvar rayonunun İkinci Çadır şəhərciyində anadan olub. 2003-cü ildə ailəsi ilə birlikdə Füzuli rayonu 3 saylı Qayıdış qəsəbəsinə köçüblər. 2018-ci ildə həqiqi hərbi xidmətə yollanan İlham sərhədçi olaraq Vətənin keşiyində dayanıb və hərbi xidməti fərqlənmə ilə başa vurub. İlham daha sonra müddətdən artıq hərbi qulluqçu kimi ordu sıralarında xidmətini davam etdirib. Vətən müharibəsində Füzuli istiqamətində gedən döyüşlərdə cəbhənin yarılmasında şücaəti ilə seçilib. O, Füzuli rayonunun Qaraxanbəyli kəndi uğrunda gedən döyüşlərdə şəhid olub.
Prezident İlham Əliyevin Sərəncamına əsasən İlham Abbasov ölümündən sonra "Vətən uğrunda", "Döyüşlərdə fərqlənməyə görə", "Füzulinin azad olunmasına görə" medalları ilə təltif edilib.
Bölmənin digər xəbərləri
