ŞƏKİDƏ 2007-Cİ İLİN BİRİNCİ YARISININ YEKUNLARI GENİŞ MÜZAKİRƏ OLUNMUŞDUR
AZƏRTAC-ın müxbiri xəbər verir ki, Azərbaycan Prezidenti İlham Əliyevin sədrliyi ilə Nazirlər Kabinetinin 2007-ci ilin birinci yarısının sosial-iqtisadi yekunlarına və qarşıda duran vəzifələrə həsr olunmuş iclasında dövlətimizin başçısının nitqlərindən irəli gələn məsələlər və ilin birinci yarısında Şəkidə görülmüş işlər şəhər icra hakimiyyətində keçirilən şura iclasında geniş müzakirə edilmişdir.
İclasda şəhər icra hakimiyyətinin başçısı Nazim İbrahimovun Şəkinin 2007-ci ilin birinci yarısında sosial-iqtisadi inkişafının yekunlarına dair hesabat məruzəsi dinlənilmişdir.
Məruzədə qeyd olunmuşdur ki, ümummilli lider Heydər Əliyevin yeniləşən Azərbaycan naminə müəyyən etdiyi xəttin Prezident İlham Əliyev tərəfindən müasir tələblərə uyğun, böyük uğurla irəliyə aparılması tutduğumuz yolun düzgünlüyünü bir daha sübüt edir.
Məruzəçi bildirmişdir ki, Prezident İlham Əliyevin sədrliyi ilə avqustun 1-də Prezident Sarayında keçirilən Nazirlər Kabinetinin 2007-ci ilin birinci yarısının sosial-iqtisadi yekunlarına və qarşıda duran vəzifələrə həsr olunmuş iclasında dövlət başçısının giriş və yekun nitqində ölkə üzrə əldə edilən sosial-iqtisadi uğurların, dinamik inkişafın mahiyyəti konkret faktlarla əsaslandırılmaqla yanaşı, hələ də mövcud olan problemlər, onları doğuran obyektiv və subyektiv səbəblər açıqlanmış, hökumət üzvlərinə və digər icra strukturlarına göstəriş, tapşırıq və tövsiyələr verilmişdir.
Natiq qeyd etmişdir ki, 2007-ci ilin ilk 6 ayı Azərbaycan Prezidenti tərəfindən müəyyən edilmiş ölkə iqtisadiyyatı inkişafının sürətləndirilməsi strategiyasının növbəti uğurlu mərhələsi kimi səciyyələndirilə bilər. Bu dövrdə iqtisadi inkişafın sürətlənməsi, qarşıya qoyulan məqsədlərin reallaşması istiqamətində nəzərdə tutulan işlər müvəffəqiyyətlə yerinə yetirilmiş və beləliklə də, yüksəliş davamlı xarakter almışdır.
Məruzədə dövlət başçısının rəhbərliyi ilə ölkədə həyata keçirilən quruculuq işlərində, qazanılan uğurlarda Şəki rayonunun da nəzərəçarpacaq yeri və rolu olduğu xüsusi qeyd edilmiş, respublikanın hər bir vətəndaşı kimi, şəkililərin də bu quruculuq prosesinin fəal iştirakçıları olduqları bildirilmişdir. Natiq qeyd etmişdir ki, hesabat dövründə rayonda 71 milyon 633 min manatlıq məhsul istehsal olunmuşdur ki, bu da keçən ilin müvafiq dövrü ilə müqayisədə 16,3 faiz artıqdır. İstehsal edilmiş məhsulun 18 faizi dövlət, 82 faizi isə özəl bölmənin payına düşür. Adambaşına düşən məhsul istehsalı 15,4 faiz artaraq 426 manat təşkil etmişdir. Rayon üzrə orta aylıq əmək haqqı 103,8 manat olmuşdur ki, bu da əvvəlki ilin eyni dövrünün müvafiq göstəricisi ilə müqayisədə 28,2 manat çoxdur.
Məruzədə qeyd olunmuşdur ki, Şəkidə regionların sosial-iqtisadi inkişafına dair Dövlət Proqramı uğurla yerinə yetirilir. Cari ilin ilk 6 ayında rayonda 730 daimi iş yeri açılmış, 3 min nəfərə yaxın vətəndaş isə mövsümi və müvəqqəti işlərə cəlb edilmişdir. Ümumiyyətlə, 2003-cü ilin oktyabrın 1-dən 2007-ci ilin iyulun 1-dək Şəkidə 5529-u və ya 35,8 faizi daimi olmaqla 15423 yeni iş yeri yaradılmışdır.
İcra hakimiyyətinin başçısı çıxışında ilin birinci yarısında “Şəki-İpək” ASC- nin, kərpic zavodu və digər sənaye müəssisələrinin fəaliyyəti barədə ətraflı məlumat vermiş, aqrar sahədə qazanılan uğurları qeyd etmiş, cari ildə rayonda 110 min tondan artıq taxıl istehsal olunmasını fermerlərin diqqətəlayiq uğuru kimi qiymətləndirmişdir. Bildirilmişdir ki, fermerlərə servis xidməti təşkil etmək üçün cari ildə Şəki Regional Aqroservis və Təchizat Bazasına 32 adda yeni kənd təsərrüfatı texnikası, habelə 1138,5 ton gübrə gətirilmişdir.
Rayonda aparılan tikinti-quruculuq işlərinə toxunan natiq, hesabat dövründə Qarabağ müharibəsi əlilləri və şəhid ailələri üçün 24 mənzilli yaşayış evinin, südçülük kompleksinin, müxtəlif nazirliklərin yerli qurumları üçün yeni inzibati binaların, Vergilər Nazirliyinin kompyuter terminalının, 9 mərtəbəli mehmanxananın, çoxmərtəbəli yaşayış binalarının və digər obyektlərin tikintisinin, Əlican çayından su kanalının çəkilişinin davam etdirildiyini bildirmiş, gələcək planlar barədə danışmışdır.
Məruzədə həmçinin əhalinin elektrik enerjisi, təbii qaz, içməli su və digər xidmətlərlə təminatının yaxşılaşdırılması, vətəndaşların ərizə və şikayətlərinə baxılması və digər məsələlər barədə danışılmış, mövcud problemlərdən və onların həlli yollarından söhbət açılmışdır.
Məruzə ətrafında müzakirələrdən sonra iclas iştirakçıları adından Azərbaycan Prezidenti İlham Əliyevə müraciət qəbul olunmuşdur.
Şura iclasında Azərbaycan Prezidenti İcra Aparatının məsul işçisi Məhərrəm Quliyev iştirak etmişdir.
Bölmənin digər xəbərləri
