“Sən, ey uşaqlıq” müsabiqəsinin finalçıları müəyyənləşib
Bakı, 17 iyul, AZƏRTAC
Azərbaycan Kinematoqrafçılar İttifaqının (AKİ) elan etdiyi “Sən, ey uşaqlıq” tammetrajlı bədii film ssenari müsabiqəsinin finalçıları müəyyənləşib.
AKİ-dən AZƏRTAC-a bildirilib ki, ittifaq artıq bir neçə ildir ssenari müsabiqələri təşkil edir. Bu təşəbbüs ölkədə ssenari yaradıcılığının inkişafına dəstək olmaq, müəlliflər arasında sağlam rəqabət mühiti yaratmaq və yeni ssenari müəlliflərinin yaradıcılıq fəaliyyətini stimullaşdırmaq məqsədi daşıyır.
Müstəqillik dövrü Azərbaycan kinosunun əsas problemlərindən biri təkcə uşaqlar üçün deyil, həm də baş qəhrəmanı uşaq olan böyüklər üçün filmlərin azlığıdır. Bu səbəbdən Azərbaycan Kinematoqrafçılar İttifaqı builki ssenari müsabiqəsini baş qəhrəmanı uşaq (15 yaşadək) olan tammetrajlı bədii film ssenarilərinə həsr edib.
Müsabiqə çərçivəsində 39 ssenari təqdim olunub. Texniki tələblərə uyğun olmayan 8 ssenari müsabiqədən kənarlaşdırılıb, 31 ssenari isə seçim mərhələsinə buraxılıb.
Müsabiqənin qalibləri avqustun 2-si açıqlanacaq. İlk üç yerin qalibi mükafatlandırılacaq.
Bölmənin digər xəbərləri
