Serbiya və Macarıstan polisi qaçaqmalçılara qarşı birgə mübarizə aparacaq
Belqrad, 1 noyabr, AZƏRTAC
Serbiya və Macarıstan polisi cinayətkar dəstələrlə mübarizə aparılması üçün iki ölkə sərhədində birgə fəaliyyət göstərmək barədə razılığa gəlib.
AZƏRTAC xəbər verir ki, Serbiya Daxili İşlər Nazirliyi sərhəddə cinayətkar dəstələrlə mübarizədə Macarıstan polisinin də iştirak edəcəyini, birgə məlumat mübadiləsinin aparılacağını açıqlayıb. Əməkdaşlığa dair razılaşma Serbiyanın daxili işlər naziri Bratislav Qaşiç və Macarıstanın daxili işlər naziri Şandor Pinter arasında Reska sərhəd-keçid məntəqəsində keçirilən görüş zamanı əldə olunub.
Görüşdə qeyri-qanuni miqrasiyaya qarşı birgə mübarizəyə dair fikir mübadiləsi aparılıb. Mütəşəkkil cinayətkarlığa və qeyri-qanuni miqrasiyaya qarşı mübarizə məqsədilə Serbiya və Macarıstanın Daxili İşlər nazirliklərinin nümayəndələri arasında birgə işçi qrupunun yaradılması təklif edilib.
Xatırladaq ki, oktyabrın 27-də Serbiyanın Macarıstanla sərhəddə yerləşən Horqos şəhəri yaxınlığında insan qaçaqmalçıları arasında baş vermiş silahlı toqquşmada üç nəfər ölüb. Həmin gündən etibarən Serbiya polisi sərhəddəki meşəlik ərazidə əməliyyat keçirir. Əməliyyata Terrorla Mübarizə Bölməsi və jandarma qüvvələrinin əməkdaşları, eləcə də helikopterlər cəlb olunub.
Bölmənin digər xəbərləri
