İQTİSADİYYAT
Serbiyanı gələcəyə aparan Azərbaycan yolu
![](/files/galleryphoto/2023/3/1200x630/1697691816890622131_1200x630.jpg)
![](/files/galleryphoto/2023/3/1200x630/1697691816966030127_1200x630.jpg)
![](/files/galleryphoto/2023/3/1200x630/16976918163663638609_1200x630.jpg)
![](/files/galleryphoto/2023/3/1200x630/16976918161764056085_1200x630.jpg)
![](/files/galleryphoto/2023/3/1200x630/16976918165702959616_1200x630.jpg)
![](/files/galleryphoto/2023/3/1200x630/1697691816418159595_1200x630.jpg)
![](/files/galleryphoto/2023/3/1200x630/16976918164894460061_1200x630.jpg)
![](/files/galleryphoto/2023/3/1200x630/1697691816486017388_1200x630.jpg)
![](/files/galleryphoto/2023/3/1200x630/16976918161933854198_1200x630.jpg)
Belqrad, 19 oktyabr, AZƏRTAC
Serbiyanın yol şəbəkəsinin şah damarı kimi qəbul olunan Ruma-Şabats avtomagistralının açılışı olub. Avtomobil yolu Azərbaycanın “AzVirt” şirkətinin 2019-cu ildə bu ölkədə icrasına başladığı Ruma-Şabats-Loznitsa layihəsinin tərkib hissəsidir.
AZƏRTAC xəbər verir ki, açılış mərasimində Serbiya Prezidenti Aleksandar Vuçiç, Baş nazir Ana Brnabiç, nazirlər, Azərbaycanın Serbiyadakı səfiri Kamil Xasiyev, eləcə də “AzVirt” MMC-nin rəhbərliyi və ictimaiyyət nümayəndələri iştirak ediblər.
Aleksandar Vuçiç indiyə qədər görülən işlərdən çox qürur duyduğunu qeyd edib. Bildirib ki, bu avtomobil yolu Serbiya vətəndaşları üçün son dərəcə əhəmiyyətlidir, onlar daha az vaxt ərzində və qısa məsafə qət etməklə mənzil başına çatacaqlar.
Dövlət başçısı 24,6 kilometr uzunluğunda tam profilli yeni avtomobil yolunun davamının (Şabats-Loznitsa) ən qısa zamanda - 2024-cü ilin sonunda başa çatdırılmasının vacibliyini də qeyd edib. Prezident bu günə qədər görülən işlərə görə Azərbaycandan olan podratçı şirkət - “AzVirt”ə təşəkkürünü bildirib.
“Mən sizə həqiqətən güvənirəm. İşinizə, bu sahədə verdiyiniz töhfəyə görə çox sağ olun deyirəm. Sağ olun ki, şirkətinizin bütün rəhbər şəxsləri ilə buradasınız. Bu, bizim dostluğumuzun və fədakar əməyinizin böyük sübutudur. “AzVirt”in rəhbəri dəqiq insandır, şirkət isə əladır. Azərbaycanlı dostlarımıza təşəkkür edirəm ki, işlərini çox yaxşı və ciddi şəkildə, həm də məsuliyyətlə yerinə yetiriblər”, - deyə Aleksandar Vuçiç vurğulayıb.
Açılış mərasimində çıxış edən “AzVirt” MMC-nin baş direktoru Kamil Əliyev serb və azərbaycanlı inşaatçıların birgə tikinti uğurlarını yüksək dəyərləndirib. O, Ruma-Şabats magistralının və nəhəng körpünün tikintisinin müqavilə şərtlərində nəzərdə tutulduğundan xeyli əvvəl Serbiya vətəndaşlarının istifadəsinə verildiyini deyib.
“Serbiyanın yol şəbəkəsinin genişləndirilməsinə töhfə vermək bizim üçün şərəfdir. Əvvəlki illər ərzində biz Serbiya və Azərbaycan hökumətlərinin əməkdaşlığının etibarlı tərəfdaşı olmaq, göstərilən etimadı doğrultmaq, bütün müqavilə öhdəliklərini ən yüksək beynəlxalq standartlara uyğun yerinə yetirmək üçün əlimizdən gələni etdik. Tikdiyimiz yolların keyfiyyətinə görə serb xalqının yaddaşında qalmaq arzusu ilə biz bütün bu illər ərzində, hətta pandemiya dövründə də daim işləmişik. “AzVirt” təkcə körpülər və yollar inşa etmir, həm də Azərbaycan Respublikası ilə Serbiya Respublikası və xalqlarımız arasında əbədi bağlar qurur”, - deyə baş direktor bildirib.
Daha sonra Kamil Əliyev Azərbaycan Prezidenti İlham Əliyev ilə Serbiya Prezidenti Aleksandar Vuçiçə ikitərəfli əlaqələrin inkişafında və gələcək nəsillərə miras qalacaq yeni birgə layihələrin işlənib hazırlanmasında göstərdikləri dəstəyə görə minnətdarlığını ifadə edib.
Qeyd edək ki, “AzVirt” şirkəti bu ölkədə 10 ildən çoxdur fəaliyyət göstərir. 2012-2016-cı illərdə Serbiya və Monteneqro arasında 11-ci Dəhlizin Liq-Prelina hissəsinin tikintisi ilk böyük layihə olaraq uğurla tamamlanıb. Bu ilin iyun ayında isə Serbiyada Belqrad dairəvi yolu istifadəyə verilib. Bütün açılışlarda Serbiya Prezidenti Aleksandar Vuçiç şəxsən iştirak edib.
Bundan başqa, “AzVirt” ölkəmizdə də uğurlu fəaliyyətini davam etdirir. Bu günlərdə şirkət ödənişli Bakı-Quba-Rusiya Federasiyası ilə dövlət sərhədi yeni avtomobil yolunun Yaşma qəsəbəsindən Siyəzən rayonuna qədər olan hissəsinin (60 km) inşasını başa çatdırıb. Eyni zamanda, “AzVirt” Qarabağda aparılan bir çox tikinti işlərinin əsas iştirakçılarından biridir. Füzuli Beynəlxalq Hava Limanı 2021-ci ildə rekord müddətə - cəmi 8 aya inşa olunaraq təhvil verilib. Zəngilan Beynəlxalq Hava Limanı düz bir il bundan öncə istifadəyə verilməklə Zəngəzur iqtisadi zonasının ayrılmaz hissəsinə çevrilib. Bu açılışlarda Azərbaycan və Türkiyə prezidentləri iştirak ediblər. Hazırda isə şirkət Laçın Beynəlxalq Hava Limanı, Horadiz-Cəbrayıl-Zəngilan-Ağbənd, Əhmədbəyli-Füzuli-Şuşa, Kəlbəcər-Laçın avtomobil yollarının tikinti işlərini davam etdirməkdədir.
Nihad Budaqov
AZƏRTAC-ın xüsusi müxbiri
Belqrad