CƏMİYYƏT
SƏRHƏD QOŞUNLARI MÜSABİQƏ ELAN ETMİŞDİR
Azərbaycan Respublikası Milli Təhlükəsizlik Nazirliyi Sərhəd Qoşunlarının Komandanlığı ölkəmizin sərhəd qoşunlarının tarixinə, sərhədlərimizin mühafizəsi sahəsində fədakar xidmətlərinə həsr olunmuş və sərhədçilərdə hərbi vətənpərvərlik ruhunun yüksəldilməsi, yaradıcılıq nümunələrinin təbliği məqsədi ilə “Azərbaycan Sərhəd Qoşunları bu gün” mövzusunda müsabiqə elan etmişdir.
Müsabiqə 4 nominasiya üzrə keçiriləcəkdir. Hər nominasiya üzrə üç mükafat təsis edilmişdir: kino sənəti \sənədli film, klip\ üzrə birinci yer üçün - iki milyon manat, ikinci yer - bir milyon yeddi yüz əlli min manat, üçüncü yer- bir milyon beş yüz min manat; bədii ədəbiyyat \povest, oçerk, hekayə, şer\, musiqi yaradıcılığı \sərhədçi marşı, sərhədçilər haqqında mahnı\ üzrə birinci yer üçün - bir milyon beş yüz min manat, ikinci yer - bir milyon iki yüz əlli min manat, üçüncü yer - bir milyon manat, təsviri sənət \rənğkarlıq, qrafika, plakat\ üzrə birinci yer - bir milyon manat, ikinci yer- yeddi yüz əlli min manat, üçüncü yer - beş yüz min manat pul ayrılmışdır. Qaliblərə diplomlar da təqdim olunacaqdır.
Hər nominasiya üzrə əlavə üç əsər milli təhlükəsizlik nazirinin və sərhəd qoşunları komandanının fəxri fərmanları ilə təltif ediləcəkdir. Müsabiqəyə çıxarılacaq əsərlər 2002-ci il iyunun 20-dək müvafiq surətdə Rəssamlar İttifaqına, Bəstəkarlar İttifaqına, Kinemotoqrafçılar İttifaqına və Yazıçılar Birliyinə təqdim olunmalıdır. Müsabiqəyə indiyədək heç bir yerdə ifa və nümayiş etdirilməmiş əsərlər buraxılır.
Müsabiqənin nəticələri 2002-ci il avqustun 18-də - Sərhəd Qoşunlarının yaranması günündə elan ediləcəkdir.
Əlavə məlumat almaq üçün 98-83-72 nömrəli telefona zənğ etmək olar.