ŞƏT ölkələrinin Hökumət Başçıları Şurasına sədrlik Tacikistana keçib
Moskva, 19 noyabr, AZƏRTAC
Şanxay Əməkdaşlıq Təşkilatına (ŞƏT) üzv dövlətlər təşkilatın Moskvada keçirilmiş Hökumət Başçıları Şurasının (HBŞ) 24-cü iclasının yekunlarına dair birgə kommunike qəbul edib.
AZƏRTAC xəbər verir ki, iclas Rusiyanın 2024–2025-ci illər üzrə ŞƏT-in HBŞ-də sədrliyinin sonuncu tədbiri olub və sədrlik artıq Tacikistana keçib.
İclasda hökumət başçıları iqtisadi-ticari və mədəni-humanitar əlaqələrin genişləndirilməsi, rəqəmsal iqtisadiyyat, energetika, süni intellekt, elm və innovasiyalar, təhsil, mədəniyyət, turizm, səhiyyə, idman və gənclər sahələrində qarşılıqlı əməkdaşlıq da daxil olmaqla geniş spektrdə məsələləri müzakirə ediblər.
İclasın yekununda 10 sənəd imzalanıb. Toplantıda Çin, Pakistan, İran, Monqolustan, Qətər və digər ölkələrin nümayəndələri iştirak ediblər.
ŞƏT Avrasiya ölkələrini etimadın möhkəmləndirilməsi, təhlükəsizlik, iqtisadi əməkdaşlıq və humanitar əlaqələrin inkişafı məqsədilə birləşdirən təşkilatdır. Azərbaycan ŞƏT-in dialoq üzrə tərəfdaşıdır.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
