SƏUDİYYƏ ƏRƏBİSTANI AZƏRBAYCANLA TƏHLÜKƏSİZLİK SAHƏSİNDƏ ƏMƏKDAŞLIĞIN İNKİŞAFINDA MARAQLIDIR
Azərbaycanın Səudiyyə Ərəbistanı Krallığındakı səfiri Elman Araslı bu ölkənin daxili işlər naziri Əmir Nayif bin Əbdüləziz Əl Səudla görüşmüşdür. Mehribanlıq və səmimilik şəraitində keçən görüşdə iki dost ölkəni maraqlandıran məsələlər müzakirə olunmuşdur.
Görüşdən sonra səfir E.Araslı jurnalistlərə müsahibəsində demişdir ki, Əmir Nayif bin Əbdüləziz Səudiyyə Ərəbistanı rəhbərliyinin Azərbaycanla təhlükəsizlik sahəsində əməkdaşlığın inkişafında maraqlı olduğunu bildirmiş və bu məqsədlə o, respublikamıza səfər etmək niyyətindədir. Əmir Nayifin Bakıya qarşıdakı səfəri zamanı Səudiyyə Ərəbistanı ilə Azərbaycan Respublikası arasında cinayətkarlığa qarşı mübarizə sahəsində protokol imzalanacaqdır.
Səfir bildirmişdir ki, o, “Azərbaycan Respublikası ilə Səudiyyə Ərəbistanı Krallığı arasında mülki və ticarət işlərində hüquqi əməkdaşlıq haqqında müqavilə”nin, “Azərbaycan Respublikası ilə Səudiyyə Ərəbistanı Krallığı arasında ekstradisiya haqqında müqavilə”nin və “Azərbaycan Respublikasının Ədliyyə Nazirliyi ilə Səudiyyə Ərəbistanı Krallığının Ədliyyə Nazirliyi arasında əməkdaşlıq haqqında saziş”in layihələrini Səudiyyə tərəfinə təqdim etmişdir. Səudiyyə Ərəbistanının müvafiq strukturları Azərbaycan tərəfinin bu təkliflərini nəzərdən keçirirlər.
Bölmənin digər xəbərləri
