Səudiyyə Ərəbistanı koronavirus pandemiyası ilə qlobal mübarizəyə 500 milyon dollar ayırıb
Qahirə, 17 aprel, AZƏRTAC
Səudiyyə Ərəbistanın Kralı Salman bin Əbdüləziz koronavirus pandemiyası ilə qlobal mübarizəyə 500 milyon dollar həcmində vəsait ayrılması barədə sərəncam imzalayıb. Bu vəsait Epidemiya Əleyhinə Tədbirlər və İnnovasiya Koalisiyası (150 milyon dollar), Qlobal Vaksin və İmmunizasiya Alyansı (150 milyon dollar) və beynəlxalq və regional səhiyyə təşkilatlarının (200 milyon dollar) hesablarına köçürüləcək.
AZƏRTAC xəbər verir ki, G20 qrupuna sədrlik edən Ər-Riyad G20 qrupuna daxil olan bütün ölkələri, habelə qeyri-hökumət təşkilatları, filantroplar və özəl sektorun başçılarını COVID-19 pandemiyası ilə mübarizə üçün ehtiyac duyulan 8 milyard dollarlıq vəsaiti toplamağa çağırıb.
Son məlumata görə, Krallıqda ötən sutka ərzində koronavirusa 518 yoluxma halı qeydə alınıb və xəstələrin ümumi sayı 6380 nəfərə çatıb. Eyni zamanda, 3 yeni ölüm halı da baş verib, həyatını itirənlərin sayı isə 83-ə çatıb.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
