Şimal-Cənub Beynəlxalq Nəqliyyat Dəhlizi üzrə rəqəmsallaşma proseslərinin sürətləndirilməsi nəzərdən keçirilib
Bakı, 3 iyul, AZƏRTAC
AZCON Holding şirkətlərindən olan “Azərbaycan Dəmir Yolları” QSC-nin (ADY) sədri Rövşən Rüstəmovun rəhbərlik etdiyi nümayəndə heyəti Rusiya Federasiyasına işgüzar səfər çərçivəsində Rusiya Dəmir Yollarının (RJD) rəhbərliyi ilə ikitərəfli, həmçinin Rusiya və İran dəmir yolu administrasiyalarının rəhbərlərinin iştirakı ilə üçtərəfli görüşlər keçirib.
ADY-dən AZƏRTAC-a bildirilib ki, görüşlərdə tərəflər arasında qarşılıqlı əməkdaşlığın mövcud vəziyyəti və genişləndirilməsi, Şimal-Cənub Beynəlxalq Nəqliyyat Dəhlizinin inkişafı, marşrutun səmərəliliyinin və yükdaşımaların artırılması müzakirə olunub. Tərəflər dəhliz üzrə rəqəmsallaşma proseslərinin sürətləndirilməsi və müasir rəqəmsal həllərin tətbiqi istiqamətində əməkdaşlıq imkanlarını da nəzərdən keçiriblər. Sonda üçtərəfli görüşün yekunu üzrə protokol imzalanıb.
Rusiya dəmir yolu administrasiyasının rəhbərliyi ilə görüşdə insan kapitalının inkişafı məsələləri də müzakirə olunub, ADY və RJD arasında kadr potensialının gücləndirilməsi üzrə fikir mübadiləsi aparılıb.
Səfər çərçivəsində, həmçinin Rusiyadakı yükgöndərənlərlə görüş keçirilib. Görüşdə ADY-nin Şərq-Qərb və Şimal-Cənub dəhlizləri ilə daşımalar üçün təqdim etdiyi təhlükəsiz və dayanıqlı xidmətlər barədə məlumat verilib. Şimal-Cənub marşrutu üzərində yerləşən Astara Terminalının genişlənən imkanları və yükaşırmalar üçün potensialı təqdim olunub.
Eyni zamanda, ADY-nin yükdaşımaların operativ idarə olunmasını və şəffaflığını təmin edən “Cargo Tracking” rəqəmsal platformasının imkanları və digər rəqəmsal həllər yük sahiblərinin diqqətinə çatdırılıb.
Tərəflər birgə təşəbbüslərin xüsusilə Şimal-Cənub Beynəlxalq Nəqliyyat Marşrutunun inkişafına töhfə verəcəyini qeyd edib.
Bölmənin digər xəbərləri
