Sinqapurda video-əlaqə vasitəsi ilə ölüm hökmü çıxarılıb
Bakı, 20 may, AZƏRTAC
Sinqapur Ali Məhkəməsi “Zoom” platformasında video-əlaqə vasitəsi ilə ilk ölüm hökmünü səsləndirib.
AZƏRTAC “Straits Times” nəşrinə istinadla xəbər verir ki, 37 yaşlı Malayziya vətəndaşı Punitham Henasan 2011-ci ildə 28,5 qram heroinin qaçaqmalçılıq yolu ilə Sinqapura keçirməkdə təqsirkar bilinib. Məhkəmə mayın 15-də onu asılmaq yolu ilə edam cəzasına məhkum edib.
Cinayətkarın vəkili müştərisinin apelyasiya şikayəti verəcəyini deyib. Sinqapur Ali Məhkəməsinin nümayəndəsi isə öz növbəsində hökmün video-əlaqə vasitəsi ilə oxunmasını koronavirus infeksiyasının yayılmasının qarşısının alınması məqsədilə tətbiq olunan məhdudiyyətlərlə əsaslandırıb.
Qeyd edək ki, Sinqapurda narkotik əleyhinə dünyada ən sərt qanunlar tətbiq olunur. Burada hətta cüzi miqdarda narkotik vasitə saxlamağa görə ölüm hökmü verilə bilər.
Bölmənin digər xəbərləri
