“Sirlər xəzinəsi” intellektual müsabiqəsinin qalibləri müəyyənləşib
Bakı, 30 mart, AZƏRTAC
Dahi Azərbaycan şairi və mütəfəkkiri Nizami Gəncəvinin anadan olmasının 880 illik yubileyi münasibətilə Mədəniyyət Nazirliyi və Azərbaycan Respublikasının Gənclər Fondunun birgə layihəsi əsasında "GencApp" mobil tətbiqi üzərindən "Sirlər xəzinəsi" intellektual müsabiqəsi keçirilir.
İl ərzində hər ay onlayn formatda keçiriləcək intellektual müsabiqənin məqsədi gənclərin asudə vaxtının səmərəli təşkili, intellektual bacarıqlarının inkişaf etdirilməsi və dünya elmi-ədəbi fikrinin diqqət mərkəzində olan Nizami Gəncəvi irsinin gənclər tərəfindən dərindən mənimsənilməsidir. Müsabiqədə 16-29 yaş arasında gənclər iştirak edir.
Nazirlikdən AZƏRTAC-a bildirilib ki, martın 17-dən 21-dək gerçəkləşən müsabiqədə 500-dən çox gənc iştirak edib. Onlar "GencApp" mobil tətbiqi üzərindən bildiriş vasitəsilə göndərilən sualları cavablayıblar. Müsabiqənin yekununda ən çox xal toplayan 3 qalib müəyyən edilərək hədiyyə qazanıb.
Qeyd edək ki, intellektual müsabiqə hər ay mütəmadi olaraq təşkil olunacaq.
Bölmənin digər xəbərləri
