Siyasi dialoq mühitinin daha da dərinləşdirilməsi ölkəmizdə aparılan islahatların mühüm tərkib hissəsidir
Bakı, 15 sentyabr, AZƏRTAC
2018-ci ildə keçirilmiş prezident seçkilərindən sonra andiçmə mərasimində Prezident İlham Əliyev ölkəmizdə siyasi sistemin və çoxpartiyalı sistemin daha da inkişaf etdirilməsinə hər cür şəraitin yaradılacağı, bütün sahələr üzrə ciddi islahatların aparılacağı anonsunu verdi. Həmi vaxtdan islahatlara start verildi və bütün istiqamətlərlə yanaşı, siyasi dialoq sahəsində də önəmli addımlar atıldı.
AZƏRTAC xəbər verir ki, bunu Yeni Azərbaycan Partiyası Nəsimi rayon təşkilatının sədri Azər Süleymanov bildirib.
O qeyd edib ki, ölkəmizdə siyasi islahatların çox mühüm istiqamətlərindən birini siyasi dialoq mühitinin daha da dərinləşdirilməsi təşkil edir. A.Süleymanov deyib: “Prezident İlham Əliyevin rəhbərliyi ilə həyata keçirilən çoxşaxəli islahatlar siyasi sistemimizi də əhatə edib. Bununla da keyfiyyətcə yeni, konstruktiv dialoq və əməkdaşlıq mərhələsinin başlanılması geniş vüsət aldı. Milli həmrəyliyə və sağlam siyasi münasibətlərə xidmət edən iqtidar-müxalifət dialoqu respublikamızda demokratik prinsiplərin inkişafında, söz və fikir, siyasi, iqtisadi azadlıqların, müstəqil mətbuatın qorunmasında mühüm əhəmiyyətə malikdir. Eyni zamanda, siyasi sistemin vacib komponentlərindən biri olan siyasi partiyalar arasında yeni sağlam münasibətlər formalaşıb”.
A.Süleymanov ötən il sentyabrın 27-də Ermənistanın ölkəmizə qarşı başladığı müharibəni xatırladaraq bildirib ki, həmin gün Azərbaycanda fəaliyyət göstərən siyasi partiyalardan 50-si mili həmrəylik nümayiş etdirərək Prezident İlham Əliyevin ətrafında sıx birləşdiklərini və dövlətimizin başçısının siyasi kursunu dəstəklədiklərini bəyan etdilər. Təbii ki, bu, respublikamızın siyasi sisteminin milli məsələlərdə həmrəy olduğunun göstəricisidir: “44 günlük Vətən müharibəsindəki şanlı Qələbəmiz Azərbaycanın dünya birliyindəki reytinqini artırdı və mövqeyini daha da möhkəmləndirdi. 30 il ərzində Ermənistanın işğalçı siyasətini, hegemonluğunu və beynəlxalq hüquq normalarına saymazlığını görməzliyə vuran bəzi beynəlxalq təşkilatlar, ölkələr Azərbaycanın güclü dövlət olduğunun bir daha şahidi oldular.
“Ölkəmizdə milli həmrəylik və siyasi dialoq istiqamətində əsaslı işlər görülüb. Siyasi partiyaların fəaliyyəti üçün daha əlverişli şərait yaradılıb. Ümumilikdə respublikamızda siyasi dialoq mühiti keyfiyyətcə yeni mərhələyə qədəm qoyub. Artıq ölkəmizdə əsaslı siyasi rəqabət və qarşılıqlı dinləmə üzərində yeni siyasi mədəniyyət formalaşır”, - deyə Azər Süleymanov vurğulayıb.
Bölmənin digər xəbərləri
