DÜNYA
Slovakiyada Avropa Parlamentinə seçkilər başlayıb
![Slovakiyada Avropa Parlamentinə seçkilər başlayıb](/files/2024/2/1200x630/17178329193105238072_1200x630.jpg)
Bakı, 8 iyun, AZƏRTAC
Bu gün 5,5 milyon əhalisi olan Slovakiyanın 4 milyondan çox seçicisi beş illik müddətə Avropa Parlamentinin 15 üzvünü seçəcək.
AZƏRTAC RTVS telekanalına istinadla xəbər verir ki, sosioloji sorğular respublikanın Baş naziri Robert Fitsoya qarşı sui-qəsddən sonra seçicilər arasında onun rəhbərlik etdiyi “İstiqamət – Sosial Demokratiya” partiyasına dəstəyin artdığını göstərir. İyunun 4-də dərc olunan sosioloji sorğunun nəticələrinə görə, seçicilərin 22,5 faizi Robert Fitsonun partiyasına səs vermək niyyətindədir.
Respublikanın ən böyük liberal müxalifət partiyası “Mütərəqqi Slovakiya” vətəndaşların 20,6 faizinin etimadını qazanıb. Siyasi simpatiyalar reytinqində üçüncü yeri Slovakiya Prezidenti Peter Pelleqrininin təsis etdiyi “Səs – Sosial Demokratiya” partiyası tutur. Onu slovakların 14 faizi dəstəkləyir.
Slovakiyanın 22 partiyası və bir koalisiya Avropa Parlamentinə öz namizədlərini irəli sürüb. Seçkinin nəticələrinin iyunun 9-da günortadan sonra elan olunacağı gözlənilir.