SOYDAŞLARIMIZIN ALMATIDA YENİ UĞURU
Abay adına Almatı Dövlət Opera və Balet teatrında Çaykovski festivalı çərçivəsində böyük bəstəkarın “Qaratoxmaq qadın” və “Yevgeni Onegin” operaları, həmçinin “Sonalar gölü”, “Şelkunçik” və “Yatmış gözəl” baletləri göstərilmişdir.
Qazaxıstanın ədəbiyyat və incəsənət xadimləri, Almatıda fəaliyyət göstərən xarici səfirliklər və beynəlxalq təşkilatların nümayəndələri bu opera və baletlərə maraqla tamaşa etmişlər. Moskvadan və Sankt-Peterburqdan gəlmiş qonaqlar da tamaşaların yüksək sənətkarlıqla hazırlandığını söyləmişlər.
“Qaratoxmaq qadın” operasının quruluşçu rejissoru, Azərbaycanın və Özbəkistanın xalq artisti, dövlət mükafatı laureatı Firudin Səfərovdur. Firudin Səfərov bundan sonra həm də bu teatrda müqavilə ilə fəaliyyət göstərəcəkdir.
Teatrın direktoru Kuanış Urazqaliyev AZƏRTAC-ın müxbiri ilə söhbətində demişdir: - Çox şadıq ki, keçmiş SSRİ məkanında tanınmış opera rejissorlarından olan Firudin Səfərov bizim dəvətimizi qəbul etdi. “Qaratoxmaq qadın” bizim teatrda onun birinci işidir. Biz tanınmış rejissorla geniş tədbirlər planı müəyyən etmişik. Əminəm ki, əməkdaşlığımız öz bəhrəsini verəcək.
Qulu Kəngərli
AZƏRTAC-ın xüsusi müxbiri
Almatı
Bölmənin digər xəbərləri
