Soyqırımı qurbanlarının xatirəsi anılıb
Bakı, 30 mart, Zərəngiz Mansurova, Aynur İsmayılova, AZƏRTAC
M.S.Ordubadinin xatirə muzeyində 31 Mart-Azərbaycanlıların Soyqırımı Gününə həsr edilmiş anma tədbiri keçirilib.
AZƏRTAC xəbər verir ki, martın 30-da təşkil olunan tədbirdə çıxış edən digər natiqlər zaman-zaman ermənilər tərəfindən xalqımıza qarşı həyata keçirilən etnik təmizləmə, soyqırımı və təcavüzkarlıq siyasətindən söz açaraq, mart soyqırımı barədə məlumat veriblər. Diqqətə çatdırılıb ki, ümummilli lider Heydər Əliyevin imzaladığı “Azərbaycanlıların Soyqırımı haqqında” 1998-ci il 26 mart tarixli Fərmanında ilk dəfə rəsmi surətdə bu hadisələrə siyasi qiymət verilib və azərbaycanlıların ermənilər tərəfindən soyqırımına məruz qalması bəyan edilib.
Bildirilib ki, XIX əsrin 90-cı illərində, 1905-1907, 1915-1920-ci illərdə Gəncədə, Qubada, Lənkəranda, Şamaxıda, Naxçıvanda, Bakıda, Kürdəmirdə azərbaycanlılara, yəhudilərə, ləzgilərə, kürdlərə və digər yerli əhaliyə qarşı erməni terrorçuları tərəfindən kütləvi qırğınlar həyata keçirilib. O illərdən uzun bir müddət keçməsinə baxmayaraq, tarixçilərimiz, arxeoloqlarımız kütləvi insan qırğınlarının canlı şahidinə çevrilən onlarla məzarlıqlar aşkar ediblər. Azərbaycan dövlətinin həyata keçirdiyi tədbirlər nəticəsində Qubada, Şamaxıda, Gəncədə və bir sıra başqa regionlarda memorial kompleksləri yaradılıb, çoxlu əsərlər, məqalələr yazılıb, abidələr qoyulub.
Muzeyin foyesində soyqırımına həsr edilmiş kitabların sərgisi nümayiş olunub.
Bölmənin digər xəbərləri
