“Standart and Poors” Fransanın kredit reytinqini aşağı salıb
Bakı, 1 iyun, AZƏRTAC
“Standart and Poors” (S&P) beynəlxalq agentliyi Fransanın kredit reytinqini “AA”dan “AA-“ya endirib.
AZƏRTAC xəbər verir ki, bu barədə S&P beynəlxalq reytinq agentliyinin məlumatında bildirilib.
“Lemonde” yazır ki, bu, ölkənin büdcə kəsirini cilovlamaq və illərlə davam edən durğunluqdan sonra iqtisadi artımı canlandırmaq üçün mübarizə aparan Emmanuel Makron hökumətinin uğursuz fəaliyyətinin nəticəsidir.
Qeyd edək ki, S&P reytinq agentliyi mayın 31-də, cümə günü ölkənin büdcə vəziyyətinin pisləşməsini əsas gətirərək, 2013-cü ildən bəri ilk dəfə Fransanın kredit reytinqini aşağı salıb. S&P Aİ-nin ikinci ən böyük iqtisadiyyatı üçün reytinqi "AA"-dan "AA-" səviyyəsinə endirmək qərarını büdcə kəsirinin 2027-ci ildə ÜDM-in üç faizindən yuxarı qalacağını proqnozlaşdırmaqla əsaslandırıb.
2023-cü ildə Fransanın ÜDM-in 5,5 faizi səviyyəsindəki büdcə kəsiri əvvəllər proqnozlaşdırılandan xeyli yüksək olub. Agentlik əlavə edib ki, Fransanın ümumi hökumət borcu 2023-cü ildəki 109 faizdən 2027-ci ilədək ÜDM-in təxminən 112 faizinə yüksələcək, bu isə “əvvəlki gözləntilərin əksinə”dir.
Bölmənin digər xəbərləri
