Struktur islahatları mədəniyyət və turizm sahəsində daha çevik idarəçiliyə xidmət edir
Lənkəran, 27 aprel, Bağır Əliyev, AZƏRTAC
Aprelin 27-də Lənkəran Şəhər Mədəniyyət Mərkəzində Mədəniyyət və Turizm Nazirliyinin regional idarələrinin fəaliyyətinə həsr olunmuş müşavirə keçirilib.
AZƏRTAC xəbər verir ki, tədbirdə nazirliyin struktur bölmə rəhbərləri, Bakı Şəhər Mədəniyyət və Turizm Baş İdarəsinin, regional mədəniyyət və turizm idarələrinin rəisləri, məsul əməkdaşları iştirak ediblər.
Müşavirədə 2017-ci ilin yanvarından fəaliyyətə başlayan regional idarələrin əldə etdiyi nəticələr təhlil olunub, onların Bakıda keçirilən beynəlxalq tədbirlərdə iştirakı ilə bağlı qarşıda duran vəzifələr müzakirə edilib.
Mədəniyyət və turizm naziri Əbülfəz Qarayev ölkəmizdə bu sahədə həyata keçirilən islahatlar haqqında danışaraq bildirib ki, Prezident İlham Əliyevin “Azərbaycan Respublikası Mədəniyyət və Turizm Nazirliyinin strukturunun təkmilləşdirilməsi haqqında” 2016-cı il 29 mart tarixli Sərəncamına uyğun olaraq, nazirliyin Bakı Şəhər Mədəniyyət və Turizm Baş İdarəsi, 15 regional mədəniyyət və turizm idarəsi yaradılıb və 2017-ci ilin əvvəlindən fəaliyyətə başlayıb. Həyata keçirilən struktur islahatları mədəniyyət və turizm sahələrində daha çevik idarəçiliyin təmin olunmasına xidmət edir.
Nazir Əbülfəs Qarayev ölkəmizdə turizmin inkişafı sahəsində görülən işlərdən və qarşıda duran vəzifələrdən söhbət açaraq qeyd edib ki, regionlarda turizm sənayesinin inkişafı, turizm klasterlərinin yaradılması istiqamətində görülən tədbirlər davam etdiriləcək.
Regional mədəniyyət və turizm idarələrinin işinin təşkili üçün islahatların davam etdiriləcəyini vurğulayan Ə.Qarayev bildirib ki, mövcud problemlərin aradan qaldırılması, müvafiq sənədləşmə işlərinin həyata keçirilməsi, müraciətlərə baxılması və vaxtında həllini tapması diqqətdə saxlanılmalıdır. Regionlarda mədəniyyət müəssisələri arasında əlaqələrin, qonşu rayonların mədəniyyət kollektivlərinin mübadiləsinin təşkili, kollektivlərdə çalışanların əməyinin qiymətləndirilməsi kimi məsələlərə də önəm verilməlidir.
Əbülfəs Qarayev Novruz bayramı münasibətilə Bakıda müxtəlif bayram tədbirlərinin keçirilməsinin, nazirliyin yeni yaradılan Milli Turizm Təbliğat Bürosunun və regional mədəniyyət və turizm idarələrinin bu işdə yaxından iştirakının təqdirəlayiq olduğunu diqqətə çatdırıb. Qeyd olunub ki, bu günlərdə Birinci vitse-prezident Mehriban Əliyevanın rəhbərliyi ilə keçirilən iclasda da bu tədbirlər yüksək qiymətləndirilib. Bayram tədbirlərində ölkəmizin bütün regionlarını təmsil edən kollektivlər bölgələrin mədəni həyatını yüksək səviyyədə nümayiş etdiriblər.
Bildirilib ki, Mədəniyyət və Turizm Nazirliyi ölkəmizdə keçirilən mötəbər tədbirlərin reallaşdırılmasında yaxından iştirak edir, qonaqların mədəni istirahətinin təşkili üçün mədəniyyət proqramları, layihələr reallaşdırılır. Bu qəbil tədbirlər cari ildə də davam etdiriləcək. IV İslam Həmrəylik Oyunları, “Formula-1” Azərbaycan Qran-prisi kimi möhtəşəm yarışlar müddətində, eyni zamanda, yay turizmi mövsümündə belə mədəni tədbirlər geniş şəkildə keçiriləcək. Regional mədəniyyət və turizm idarələri bu tədbirlərə öz töhfələrini verməli, ölkəmizin mədəni, tarixi dəyərlərinin, turizm imkanlarının xarici qonaqlara tanıdılması və təbliği işində yaxından iştirak etməlidirlər.
Nazir Ə.Qarayev yerlərdə mədəniyyət və turizm xidmətlərinin günün müasir tələbləri səviyyəsində qurulmasının vacibliyini bir daha diqqətə çatdırıb.
Tədbirdə yay turizm mövsümünə hazırlıq, yeni turizm marşrutlarının yaradılması istiqamətində də tapşırıqlar verilib.
Çıxış edənlər mövcud problemlərin həlli, mədəniyyət müəssisələrinin fəaliyyətinin optimallaşdırılması, tələblərə uyğun gəlməyən müəssisələrin gələcək fəaliyyəti ilə bağlı təkliflərini bildiriblər.
Müşavirədə regional mədəniyyət və turizm idarələrinin fəaliyyəti və qarşıda duran vəzifələrin icrası nəzərdən keçirilərək bu sahədə fikir mübadiləsi aparılıb. İdarə rəhbərlərinə işlərinə daha ciddi yanaşılması və səmərəli fəaliyyət göstərməsi məqsədilə tapşırıqlar verilib.
Bölmənin digər xəbərləri
