Almatidaki “Miss Planet” foto salonunda beynəlxalq və ittifaq müsabiqələri laureatı, fotorəssam, soydaşımız Corc Xələfovun “Sülhü qoruyaq” adlı fərdi sərgisi keçirilmişdir. On gün çəkən sərgiyə şəhər ictimaiyyəti, ədəbiyyat və incəsənət xadimləri, xarici səfirliklər, iş adamları böyük maraq göstərmişlər.

Narahat dünyamızda sülhün qorunması, insanların xoşbəxt yaşaması fotorəssamın yaradıcılığında əsas yer tutur. İndiki sərgidə nümayiş etdirilən 400-dən artıq əsərin təxminən yarısı bu mövzuya həsr edilmişdir. Bundan başqa sərgidə ekologiya, narkomaniya, qadın və təbiət, təbiətin və insanın həmahəngliyi mövzularındakı əsərlər də tamaşaçılarda böyük maraq oyatdı.

Corc Xələfovun Bakı, Ankara, İstanbul, İzmir, Leypsiq, Nyu-York, Lozanna, Paris, Münhen və başqa şəhərlərdə fərdi sərgiləri keçirilmişdir. Foto rəssamın əsərləri Azərbaycan, ABŞ, Almaniya, Türkiyə, Fransa, Rusiya, Qazaxıstan və başqa ölkələrdə şəxsi kolleksiyalarda saxlanılır. İsveçrə televiziyası fotorəssamın yaradıcılığı ilə bağlı sənədli film çəkmiş və nümayiş etdirmişdir. Onun əsərləri “Yevrovideniye” kanalı ilə dəfələrlə göstərilmişdir.

C.Xələfov AZƏRTAC-ın müxbiri ilə söhbətində dedi: Bakıda fərdi sərgini keçirmək arzumu hələ ki, reallaşdıra bilməmişəm. Maliyyə çatışmazlığı ucbatından bu işi görə bilmirəm. Amma imkan yaranan kimi bu arzumu da həyata keçirəcəyəm.

Qulu Kəngərli

AZƏRTAC-ın xüsusi müxbiri

Almatı