SUMQAYITDA BEYNƏLXALQ AHILLAR GÜNÜ QEYD EDİLMİŞDİR
Sumqayıt İcra Hakimiyyətinin ictimai təşkilatlar və siyasi partiyalarla iş şöbəsinin müdiri Seyfəddin Rəhimov tədbir iştirakçılarını səmimi təbrik etmişdir. Qeyd olunmuşdur ki, BMT-nin qərarı ilə hər il oktyabrın 1-də bütün dünya ahılları təbrik edir və bu gün milli mentalitetimizə mənən yaxındır. Azərbaycanlılar ahıllara həmişə xüsusi diqqət, qayğı və hörmətlə yanaşırlar.
S.Rəhimov respublikamızın inkişafına layiqli töhfə vermiş ahılların ehtiyaclarına dövlətimizin diqqətini xüsusi vurğulamışdır. Onların bir çoxu yüksək dövlət mükafatlarına layiq görülmüş, Prezident təqaüdçüsüdür.
Şəhərdə Əhalinin Sosial Müdafiəsi Mərkəzi təxminən 800 ahıl sumqayıtlını himayəyə götürmüşdür. Burada onlar xidmətçi heyətin və könüllülərin gündəlik diqqət və qayğısı ilə əhatə olunmuşlar. Onların məişət problemləri dərhal və pulsuz həll edilir, ərzaq məhsulları və dava-dərman sarıdan korluq çəkmirlər. Bu, dövlətimizin ahıl vətəndaşlarına humanist münasibətinə dəlalət edir. Bütün bunların hamısı Azərbaycan Prezidenti İlham Əliyevin uğurla apardığı və əhalinin sosial müdafiəsinin təmin olunmasına yönəldilmiş siyasətin nəticəsidir.
Əmək veteranları, pensiyaçılar çıxış edərək, şəhərdə aparılan yenidənqurma işləri ilə bağlı təəssüratlarını bölüşmüş, demokratik dövlət quruculuğunun təməlini qoymuş ümummilli liderimiz Heydər Əliyevin böyük xidmətlərini vurğulamışlar.
Sonda bədii özfəaliyyət kollektivləri maraqlı konsert proqramı ilə çıxış etmişlər.
