“Suraxanı” gəmi-muzeyində “Dənizə doğru” adlı sərgi keçiriləcək
Bakı, 13 iyul, AZƏRTAC
“Azərbaycan Xəzər Dəniz Gəmiçiliyi” QSC-nin (ASCO) “Suraxanı” gəmi-muzeyinin və “Chagh Art Platform”un təşkilatçılığı ilə “Dənizə doğru” adlı qrup sərgisi keçiriləcək.
AZƏRTAC xəbər verir ki, sərginin açılış mərasimi iyulun 16-sı saat 18:00-da “Suraxanı” Gəmi-Muzeyində keçiriləcək.
Sərginin mövzusu hər kəsin müxtəlif səbəblərdən üz tutduğu Xəzər dənizidir. Kimi neft buruqlarına çalışmağa, kimi sadəcə istirahətə, kimi ucsuz-bucaqsız mavi səma və dənizin seyrinə dalmaq üçün Xəzəri ziyarət edir.
Bunun üçün ziyarətçiləri Azərbaycanın tanınmış rəssamları Eldar Qurbanov, İntiqam Ağayev, Rafail Əliyev, Vüqar Əli, Rəşad Cabarov, Mir Azər Abdullayev, Anar Hüseynzadə, Elşən Karaca, Leyla Altunay, Milena Nəbiyeva, Emin Qəhrəmanov, Elçin Hüseyn, Məmməd Rəşidov, Günel Ravilova, Abbas Məmmədov, Diana Əliyeva, Səbinə Səfərova, Aqil Həşimov, Rəşad Rzayev, Sahib Yaqubov və sair kimi rəssamların marina janrında təsvir etdikləri əsərlərə nəzər yetirməyə dəvət edirik.
Bildirilib ki, sərgidə 40-a yaxın rəsm əsəri nümayiş olunacaq və bu, “Chagh Art Platform”un ilk sərgisidir. Sərgi iyulun 17-si saat 10:00-dan 19:00-dək davam edəcək.
Qeyd olunub ki, açılış günü giriş sərbəstdir.
Bölmənin digər xəbərləri
