Tailand kralı X Ramanın tacqoyma mərasimi keçirilib
Bakı, 4 may, AZƏRTAC
Tailand kralı Maxa Vaçiralonqhorn (X Rama) mayın 4-də Banqkokda rəsmən taclandırılıb.
AZƏRTAC TASS informasiya agentliyinə istinadla xəbər verir ki, mərasim ölkə telekanalları vasitəsilə canlı yayımlanıb.
X Rama 7,3 kiloqram ağırlığında böyük qələbə tacını öz əli ilə başına qoyub. Çünki kralın başına toxunmamaq üçün bunu başqası edə bilməz. Tailandlılar üçün baş bədənin ən vacib hissəsi sayılır və ona toxunmaq qadağandır. Keçmişdə rahibin başına toxunmaq küfr sayılırdı və ölüm hökmü ilə cəzalandırılırdı.
Bundan sonra baş bramin tam rəsmi titullu qızıl plastini, kral reqaliyalarını, qədim ordenləri və digər ali hakimiyyət atributlarını Zati-alilərinə təqdim edib. Ardından X Rama kraliça Suthidanın kral tituluna dua edib. Onlar birlikdə Böyük kral sarayındakı Amarindra Viniçhaya taxt zalında keçirilən dini mərasimə qatılıblar və bununla da tacqoyma mərasiminin birinci hissəsi başa çatıb.
Günün ikinci yarısında X Rama kral ailəsi üzvlərini, Məxfi Kral Şurasını və Nazirlər Kabinetini, həmçinin yüksək vəzifəli şəxsləri qəbul edəcək. Daha sonra “Zümrüd Budda” məbədinə gedərək özünü Tailandda buddizmin hamisi elan edəcək. Mərasim günü Çakrabat Bimandakı kral iqamətgahının təhvil alınması ilə yekunlaşacaq.
Xatırladaq ki, Tailand kralı Maxa Vaçiralonqhorn (X Rama) 2016-cı ildə, ölkəyə 70 il rəhbərlik edən atası Phumilhon Adulyadetin (IX Rama) vəfatından sonra taxta çıxıb.
Bölmənin digər xəbərləri
