TANINMIŞ İDMANÇILAR MƏKTƏBLİLƏR QARŞISINDA NÜMUNƏVİ AÇIQ DƏRS KEÇMİŞLƏR
AZƏRTAC xəbər verir ki, noyabrın 26-da Çingiz Babayev adına 20 nömrəli orta məktəbdə Olimpiya çempionu Fərid Mansurov və dünya və Avropa çempionatlarının qalibi Rövşən Bayramovun iştirakı ilə məktəblilər üçün nümunəvi açıq dərs keçirilmişdir.
Tədbirdə çıxış edən gənclər və idman nazirinin müavini İsmayıl İsmayılov məktəbə dəvət olunmuş tanınmış Azərbaycan güləşçilərinin idman sahəsində böyük nailiyyətlər qazandıqlarını, beynəlxalq arenada ölkənin idman şərəfini daima uca tutduqlarını bildirmişdir.
Respublikanın idman inkişafından bəhs edən nazir müavini demişdir ki, idmançılarımızın beynəlxalq yarışlardakı uğurları Prezident İlham Əliyevin bu sahəyə daim diqqət və qayğısından irəli gəlir. İ.İsmayılov ümummilli lider Heydər Əliyevin ölkəmizdə idmanın inkişafı ilə bağlı gördüyü işlərin indi Prezident İlham Əliyev tərəfindən uğurla davam etdirildiyini söyləmişdir.
Respublikamızın ən ucqar bölgələrində Olimpiya-idman komplekslərinin, idman qurğularının tikilib istifadəyə verilməsi nəticəsində idmana kütləvi axının təmin olunduğunu deyən İ.İsmayılov bütün bunların gənc nəslin sağlam böyüməsində mühüm rol oynadığını vurğulamışdır.
Nazir müavini məktəbdə təhsil alan uşaqlar arasında Azərbaycanı beynəlxalq səviyyədə layiqli təmsil edəcək idmançıların yetişəcəyinə əminliyini bildirmişdir.
Tədbirin sonunda tanınmış güləşçilərin məktəblilər qarşısında nümunəvi çıxışları olmuşdur.
######
 |
 |
Bölmənin digər xəbərləri
