Mayın 10-da ümummilli lider Heydər Əliyevin Fəxri xiyabandakı məzarını on minlərlə insan ziyarət edib

Bakı, 10 may, AZƏRTAC

Müasir müstəqil Azərbaycanın memarı və qurucusu, dünya şöhrətli siyasi xadim Heydər Əliyevin 95 illiyi Fəxri xiyabanda ümumxalq ziyarəti ilə qeyd edilib. Burada yaşanan izdiham xalqımızın ulu öndər Heydər Əliyevə tükənməz məhəbbətini bir daha nümayiş etdirib.

Mayın 10-da səhər tezdən Fəxri xiyabana insan axını başlayıb. Bura üz tutan hər kəs ümummilli lider Heydər Əliyevin Azərbaycana rəhbərlik etdiyi hər iki dövrdə Vətəni və xalqı qarşısında misilsiz xidmətlərini, liderlik və xilaskarlıq missiyasını şərəflə yerinə yetirdiyini yaxşı xatırlayır. Ümummilli Liderin Azərbaycan naminə gördüyü böyük işlər ona tarixdə və yaddaşlarda əbədiyaşarlıq qazandırıb.

Heydər Əliyev böyük azərbaycanlı idi və qürurla deyirdi: “Mən həmişə fəxr etmişəm, bu gün də fəxr edirəm ki, mən azərbaycanlıyam”. Bu dahi şəxsiyyətdən söhbət düşəndə hər kəs, ilk növbədə, Heydər Əliyevin Azərbaycanın dövlət müstəqilliyinin dönməzliyini və əbədiliyini təmin etdiyini, onun xilaskarlıq missiyasını, ölkəmizi inkişaf yoluna çıxardığını xüsusi vurğulayır.

Bu may səhəri Fəxri xiyabana gələn ziyarətçilər arasında bütün nəsillərin nümayəndələrini görmək olar. Onların hamısını - məktəblini və tələbəni, cavanı və ahılı da buraya Heydər Əliyevə olan məhəbbət gətirib. Ziyarətçilər arasında Azərbaycanın bütün guşələrindən, xarici ölkələrdən gələn qonaqlar da var.

AZƏRTAC-ın müxbirləri Ulu Öndərin Fəxri xiyabandakı məzarını ziyarət edən müxtəlif nəsillərin nümayəndələrindən, ayrı-ayrı peşə sahiblərindən müsahibələr alıblar.

Fəxri xiyabana gələnlər arasında gənclər çoxluq təşkil edirdilər. Bu da təsadüfi deyil. Xalqımızın ümummilli lideri Heydər Əliyev gənclərə xüsusi qayğı ilə yanaşır, onları Azərbaycanın gələcəyi hesab edirdi. Onun gənc nəslin inkişafına göstərdiyi yüksək diqqət və etimad yaddaşlardan silinməyib və bu gün də minnətdarlıq hissi ilə anılır.

Hər il ulu öndər Heydər Əliyevin doğum və anım günlərində dahi liderin məzarını ziyarət etməyi özünə mənəvi borc bilən gənclərdən biri də Türkiyənin Təhsil Nazirliyinin nəzdində fəaliyyət göstərən FONO qurumunun baş təhsil məsləhətçisi Nəzərbəy Hacıağayevdir. O deyib: “Ümummilli lider Heydər Əliyev həmişə gənclərin elmə, savada yiyələnmələrinə, onların yüksək təhsil almalarına böyük önəm verirdi. Bu gün Azərbaycanda uğurlu dövlət gənclər siyasəti həyata keçirilir. Bu siyasətin təməli ulu öndər Heydər Əliyev tərəfindən qoyulub və Prezident İlham Əliyev tərəfindən uğurla davam etdirilir. Azərbaycan gəncləri dünyanın ən nüfuzlu universitetlərində təhsil almağa göndərilir. Bütün bunlar Azərbaycan gəncliyinin həyatında dərin izlər qoyur, yüksək intellektə malik yeni nəsil yetişməsi ilə nəticələnir”.

Ümummilli Lider çıxışlarında dəfələrlə vurğulayırdı ki, müstəqil dövlətimizdə uşaqların sağlam, yüksək mənəvi-əxlaqi mühitdə, milli dəyərlər əsasında kamil tərbiyə alaraq layiqli şəxsiyyət kimi yetkinləşməsi olduqca mühüm əhəmiyyət kəsb edir. Ulu öndər bu məqsədlərə nail olmaq üçün hərtərəfli şərait yaratmağa çalışır, davamlı addımlar atır, təhsil işçilərinə müvafiq tövsiyələr verirdi.

Fəxri xiyabana bağça uşaqları ilə birlikdə gələn tərbiyəçi Zamirə Ənnağıyeva deyib: “Dahi şəxsiyyət Heydər Əliyev xalqın, dövlətin ən böyük və qiymətli sərvətinin uşaqlar olduğunu gözəl bilir, onları çox sevirdi. Ümummilli Lider hər zaman fidan balalara, onların təhsil almalarına və sağlam ruhda böyüməsinə böyük önəm verirdi. Hesab edirəm ki, uşaqlar da görkəmli şəxsiyyət, müstəqil respublikamızın memarı və qurucusu Heydər Əliyevi tanımalı, onun haqqında daha çox məlumat almalıdırlar. Ölkəmizin bugünkü inkişafında və çiçəklənməsində, eləcə də, gələcəyimiz olan uşaqların sağlam və xoşbəxt böyüməsində, cəmiyyətə faydalı vətəndaş kimi yetişməsində Ulu Öndərin böyük xidmətləri danılmazdır”.

Heydər Əliyevin hakimiyyəti dövründə ölkəmizdə həyatın bütün sahələri kimi, mədəniyyət də inkişaf edib, yaradıcı insanlar dövlət qayğısı ilə əhatə olunub.

Fəxri xiyabana gələn şair Qurban Hüseyn Ulu Öndər haqqında ürək sözlərini belə ifadə edib: “Heydər Əliyev zəmanəmizin yetişdirdiyi ən böyük şəxsiyyətdir. Belə bir dərin zəka sahibinin, müdrik və nadir şəxsiyyətin azərbaycanlı olması qəlbimizdə qürur hissləri doğurur. Ulu Öndəri nə qədər tərənnüm etsək də, onun işıqlı obrazını tam dolğunluğu ilə yaratmaq mümkün deyil. Çünki bu böyük şəxsiyyətin xalqımızın rifahı naminə gördüyü işlər ölçüyəgəlməzdir. Heydər Əliyev şair və yazıçılara, mədəniyyət və incəsənət xadimlərinə həmişə diqqət və qayğı ilə yanaşırdı. Klassik və müasir ədəbi şəxsiyyətlərin yubileylərinin keçirilməsi, ədəbiyyatımızın bütün dünyada yetərincə təbliği Ulu Öndərin adı ilə bağlıdır. Bu dahi şəxsiyyətin Azərbaycan mədəniyyətinin qorunub saxlanılmasında və inkişafında da misilsiz xidmətləri olub”.

Heydər Əliyevin Azərbaycana rəhbərliyinin hər iki dövründə elmə, təhsilə xüsusi diqqət yetirdiyini xatırladan müəllim Aygün Əsgərova deyib: “Heydər Əliyev müstəqil Azərbaycanda milli təhsil quruculuğu sahəsində köklü islahatların təməlini qoyub. Onun 1993-cü ildə hakimiyyətə qayıdışı təhsil sahəsində də tənəzzülün qarşısını almağa imkan verdi, təlim-tərbiyə müəssisələrinin ahəngdar işi bərpa olundu, təhsil sisteminin müstəqil dövlətçilik prinsipləri əsasında qurulmasına tarixi şərait yarandı. Bu gün iftixarla demək olar ki, elm və milli təhsil sahələrində qazanılan uğurlar Heydər Əliyevin adı ilə bağlıdır. Müstəqillik illərində təhsil sahəsində beynəlxalq əlaqələr genişlənib və hazırda dünya təcrübəsi də öyrənilməklə Azərbaycanda təhsil sisteminin inkişafı üçün məqsədyönlü işlər görülür”.

Fəxri xiyabana gələnlər arasında Qarabağ müharibəsi əlilləri və şəhid ailələrinin üzvləri də var. Şəhid anası Səlvi Ələkbərova AZƏRTAC-a müsahibəsində onlara göstərilən dövlət qayğısından razılıqla söhbət açıb: “Ulu öndər Heydər Əliyev xalqımız və dövlətimiz üçün çox böyük işlər görüb. Azərbaycan xalqı onu heç zaman unutmayacaq. Ümummilli Lider hər zaman şəhid ailələrinə həssaslıqla yanaşırdı, Biz də bu diqqət və qayğını həmişə hiss etmişik, bu gün də hiss edirik.

Vətənimizin müdafiəsi uğrunda canlarını qurban verən şəhidlərimizin xatirəsini əbədiləşdirmək üçün o vaxt da, indi də gərəkli addımlar atılır. Buna görə Ulu Öndərin siyasətini layiqincə davam etdirən Prezident İlham Əliyevə şəhid ailələri adından minnətdarlığımızı bildiririk”.

Paytaxt sakini Ramiz Xəlilov öz evində “Dədə Heydər” muzeyi yaradıb. O, bu barədə danışaraq deyib: “Yaratdığım muzeyi uzun illərdir çoxsaylı insanlar ziyarət edir. Mən bu muzeyin yaradılmasına 1993-cü ildə Heydər Əliyevin hakimiyyətə qayıdışından sonra başlamışam. Dahi rəhbərin həyatı və fəaliyyəti haqqında gənc nəslə məlumat verilməsi vacibdir və “Dədə Heydər” muzeyi də buna xidmət edir.

Azərbaycanın yeni əsrdəki yeni lideri Prezident İlham Əliyev Azərbaycanı daha da inkişaf etdirərək beynəlxalq aləmdə söz və nüfuz sahibinə çevirib. Xalqımız bütün bunlara görə özünü Ulu Öndərə və onun layiqli davamçısı Prezident İlham Əliyevə borclu sayır”.

Azərbaycanın böyük oğlu Heydər Əliyevin anadan olmasının 95-ci ildönümü bölgələrdə də izdihamlı mərasimlərlə qeyd olunub. Quba Rayon Ağsaqqallar Şurasının sədri Həsən Günəşli AZƏRTAC-ın bölgə müxbirinə müsahibəsində Ulu Öndərin bölgələrin inkişafı istiqamətində gördüyü işləri xatırladaraq deyib: “Azərbaycanın hər bir bölgəsində, hər bir rayonunda ulu öndər Heydər Əliyevin gördüyü işlərin nişanələri var. Hazırda bizim rayonun iqtisadiyyatının əsasını bağçılıq təşkil edir, yerli camaatın böyük hissəsi ailə büdcəsini alma bağlarının gəliri hesabına formalaşdırır. Qubada meyvəçiliyin inkişafı ümummilli lider Heydər Əliyevin adı ilə bağlıdır. Onun təşəbbüsü ilə 1974-cü ildə meyvəçiliyin daha da inkişaf etdirilməsi tədbirləri haqqında xüsusi qərar qəbul olunmuşdu. Bununla da respublikada, o cümlədən Qubada bağçılıq təsərrüfatının inkişafında yeni mərhələnin başlanğıcı qoyuldu. Heydər Əliyevin Azərbaycana birinci rəhbərliyi dövründə nə qədər möhtəşəm işlər görüldüyü hamıya məlumdur. Müstəqillik dövründə isə Ulu Öndərin hakimiyyətə qayıdışı Azərbaycanı məhv olmaqdan xilas etdi. Bu gün ölkəmiz onun müəyyənləşdirdiyi strategiya əsasında uğurla inkişaf edir, beynəlxalq müstəvidə mövqelərini möhkəmləndirir”.

Zaqatala şəhərindəki şəhid Zəfər Murtuzəliyev adına 1 nömrəli tam orta məktəbin direktoru, “Tərəqqi” medallı, Əməkdar Müəllim Fatma İsrafilova AZƏRTAC-ın bölgə müxbirinə müsahibəsində Ulu Öndərlə bağlı xatirələrini bölüşüb. Bu dahi şəxsiyyəti yaxından görməsini özü üçün böyük xoşbəxtlik hesab edən Fatma xanım deyib: “Bu gün dahi rəhbərin Zaqatalada ucaldılan abidəsini ziyarət etdim. Heydər Əliyevi ilk dəfə tələbəlik dövründə, 1971-ci ildə Nizami Gəncəviyə həsr olunmuş respublika tədbirində yaxından görmüşdüm. 1998-ci ildə Azərbaycan Qadınlarının I Qurultayında dahi rəhbərlə birlikdə xatirə şəkli çəkdirən fəal qadınlar arasında mən də var idim. Həmin fotonu 20 ildir ki, ən qiymətli xatirə kimi böyük məhəbbətlə qoruyub saxlayıram. Ulu Öndəri Vətəninə, xalqına, torpağına, millətinə həyat verən günəşə bənzədərdim. Şükürlər olsun ki, o, Azərbaycana özü kimi uzaqgörən layiqli davamçı, Ali Baş Komandan bəxş etdi. İndi müstəqil Azərbaycan Prezident İlham Əliyevin rəhbərliyi ilə xoşbəxt gələcəyə doğru inamla irəliləyir”.

X X X

Fəxri xiyabana insan axınının ardı-arası kəsilmirdi. Burada yaşanan izdiham xalqın öz Ümummilli Liderinə, xilaskarına dərin ehtiramdan, tükənməz sevgisindən xəbər verirdi.

Milyonlarla insanın ümid çırağına çevrilərək qəlblərdə yurd salmaq heç də bütün dövlət rəhbərlərinə, liderlərə nəsib olmur. Hələ sağlığında canlı əfsanəyə çevrilmiş Heydər Əliyev ürəklərdə özünə əbədi abidə ucaldıb. Onun parlaq ideyaları gələcəyə gedən yollarımızı hələ uzun illər işıqlandıracaq.