Bakı, 20 sentyabr, AZƏRTAC

“Bu gün Azərbaycan bütün sahələr üzrə sürətlə inkişaf edən qüdrətli dövlət kimi dünyanın diqqət mərkəzindədir. İkinci Vətən müharibəsində Ermənistan üzərində 44 gün ərzində qazanılan tarixi Qələbə ölkəmizin dünya miqyasında nüfuzunu daha da artırdı. Bu şanlı Zəfərdən 3 il sonra - 2023-cü il sentyabrın 19-dan 20-dək Azərbaycan Ordusunun Qarabağda apardığı lokal xarakterli antiterror tədbirləri separatizmə birdəfəlik son qoydu. Cəmi 23 saat 43 dəqiqə ərzində erməni separatçıları ağ bayraq qaldırmağa məcbur oldular. Qarabağın erməni sakinlərinin nümayəndələrinin Rusiya sülhməramlı kontingenti vasitəsilə müraciətini nəzərə alaraq, tam atəşkəs haqqında razılaşma əldə olundu və 2023-cü il sentyabrın 20-də lokal xarakterli antiterror tədbirləri dayandırıldı. Yenilməz ordumuzun antiterror tədbirlərinin uğurla başa çatması nəticəsində Azərbaycan öz suverenliyini bərpa etdi”.

Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.

O deyib ki, İkinci Qarabağ müharibəsindən sonra Azərbaycan dəfələrlə Ermənistana davamlı sülh üçün çağırışlar etsə də, işğalçı ölkə hər dəfə danışıqlardan boyun qaçırmış, bununla kifayətlənməyərək suveren ərazilərimizdə silahlı təxribatlarını davam etdirmişdir. 2020-ci il 10 noyabr tarixli üçtərəfli Bəyanata zidd olaraq Ermənistan üç il ərzində öz silahlı qüvvələrini, canlı qüvvəsini və texnikasını bizim ərazimizdən çıxarmamışdır. İkinci Qarabağ müharibəsindən dərhal sonra ölkəmiz dəfələrlə haqlı narahatlığını ifadə edib. Ermənistan rəhbərliyinə, onların xaricdəki havadarlarına və digər tərəflərə müraciət edərək deyilmişdir ki, Ermənistan silahlı qüvvələrinin Azərbaycan ərazisində qalması qanunsuzdur və buna son qoyulmalıdır. Düşmən məqsədyönlü şəkildə Azərbaycana qarşı terror aktlarını həyata keçirmək üçün 2021-ci ildə Ermənistanda istehsal olunmuş minalardan istifadə edib. Laçın sərhəd-buraxılış məntəqəsi qurulmayana qədər İkinci Qarabağ müharibəsindən sonra Ermənistandan Azərbaycanın Qarabağ bölgəsinə qanunsuz olaraq minalar gətirilib və müxtəlif yerlərdə basdırılmışdır.

Ə.Bədəlov imzalanmış kapitulyasiya aktından sonra Azərbaycanın Qarabağ bölgəsində 10 mindən artıq Ermənistan silahlı qüvvələrinin birləşmələri və qeyri-qanuni erməni silahlı dəstələrinin mövcudluğundan söhbət açaraq bildirirb ki, üçtərəfli Bəyanata əsasən, Qarabağ ərazisindəki erməni yaraqlıları 3 il əvvəl tərk-silah edilməli idilər: “Azərbaycan işğala məruz qalan tərəf olsa da, Qarabağda baş verən gərginliyin aradan qaldırılması, azərbaycanlılarla ermənilərin birgə yaşayışını təmin edəcək reinteqrasiya prosesinin normal davam etməsi və məsələnin ikitərəfli danışıqlar yolu ilə həllinin tapması üçün 3 il müddətində əlindən gələni etdi. Təəssüf ki, Azərbaycanın humanist çağırışlarının əvəzində erməni silahlı qüvvələri sayını artırmaqla, yeni silahlar alıb, təxribatlar törətməklə məşğul idilər. Vəziyyət o həddə çatmışdı ki, Qarabağda separatçılar müstəqillik iddialarından əl çəkmir, özlərinin oyuncaq “prezident”lərini seçir, qondarma “parlament”ləri adından Azərbaycan dövlətinin əleyhinə bəyanatlar verirdilər”.

Siyasi şərhçi 2021-ci ildə Azərbaycan və Ermənistanda sərhədin delimitasiyası üzrə işçi qrupların yaradıldığını xatırladıb. Qeyd edib ki, bundan sonra da ermənilər sərhəddə təxribatları davam etdirir, şərti dövlət sərhədi istiqamətində Azərbaycan Ordusunun mövqelərini atəşə tuturdular. Getdikcə azğınlaşan Azərbaycanın Qarabağ bölgəsində yerləşən işğalçı Ermənistan silahlı qüvvələrinin birləşmələri, qeyri-qanuni erməni silahlı dəstələri 2023-cü ilin martında Şuşa istiqamətində təxribatlar törətməyə başladılar. 2023-cü il sentyabrın 19-da Azərbaycanın Qarabağ bölgəsindəki erməni silahlı qüvvələri bir sıra genişmiqyaslı hərbi təxribatlar və terror hücumları törətdilər. Erməni kəşfiyyat-diversiya qrupları tərəfindən Əhmədbəyli – Füzuli – Şuşa avtomobil yolunda terror məqsədilə əvvəlcədən quraşdırılmış minaların partlaması nəticəsində mülki şəxslər, Daxili İşlər Nazirliyinin Daxili Qoşunlarının hərbi qulluqçuları şəhid oldu və yaralandılar. Bununla yanaşı, ordumuzun bölmələri minaatanlardan və müxtəlif çaplı atıcı silahlardan atəşə tutuldu. Nəticədə, Azərbaycan Ordusunun iki hərbi qulluqçusu yaralandı. Həmin gün Azərbaycanın Qarabağ bölgəsində qanunsuz yerləşdirilmiş erməni silahlı qüvvələrinin növbəti terror aktı nəticəsində Ağdam və Şuşa şəhərlərində müvafiq olaraq iki mülki şəxs həlak oldu. Qeyri-qanuni erməni silahlı birləşmələrinin döyüş mövqelərini gücləndirməsi və bölmələrini yüksək döyüş hazırlığı səviyyəsinə gətirməsi Azərbaycan Ordusunun bölmələri tərəfindən təsbit edildi. Artıq bu təxribatların qarşısının alınmasının vaxtı çatmışdı. Məhz bu baxımdan üçtərəfli Bəyanatın müddəalarının icrasının təmin olunması, Azərbaycan Respublikasının Konstitusiya quruluşunun bərpa edilməsi məqsədilə bölgədə lokal xarakterli antiterror tədbirlərinə başlanıldı.

Antiterror tədbirlərinin uğurla başa çatmasında ordumuzun peşəkarlığını xüsusi qeyd edən siyasi şərhçi bildirib ki, Ermənistan silahlı qüvvələrinin birləşmələrinin ön xətt və dərinlikdə olan mövqeləri, uzunmüddətli atəş nöqtələri, eləcə də döyüş vasitələri, həmçinin hərbi təyinatlı obyektləri yüksək dəqiqliklə silahların tətbiqi ilə sıradan çıxarıldı. Bu tədbirlər zamanı əsgər və zabitlərimiz böyük qəhrəmanlıq, şücaət, peşəkarlıq göstərmişlər. Mürəkkəb relyef şəraitində, düşmən mövqelərinin təpələrdə, əlverişli yerlərdə yerləşdirilməsinə baxmayaraq, hərbçilərimiz qəhrəmanlıq, peşəkarlıq göstərərək qısa müddətdə bütün istiqamətlər üzrə əhəmiyyətli dərəcədə hərbi uğurlar əldə etdilər. Şəhidlərimizin, igid əsgər və zabitlərimizin fədakarlığı, peşəkarlığı, qəhrəmanlığı nəticəsində bu gün işğaldan azad edimiş ərazilərdə genişmiqyaslı yenidənqurma, tikinti-quruculuq işləri uğurla davam etdirilir. Artıq “Böyük Qayıdış” proqramı reallığa çevrilib və keçmiş məcburi köçkünlər böyük coşqu ilə doğma ata-baba yurdlarına qayıdırlar. Hazırda bu proses uğurla davam etdirilir.

Ə.Bədəlov daha sonra Prezident İlham Əliyevin 2023-cü il sentyabrın 20-də xalqa müraciətində həm özünün, həm də ölkəmizin mövqeyini bir daha qəti şəkildə bəyan etdiyni xatırladıb:

“Azərbaycan və Ermənistan öz aralarında olan məsələləri tənzimləyəcək, sülh müqaviləsi imzalayacaq və Cənubi Qafqaz ölkələri üçtərəfli formatda gələcək əməkdaşlıq haqqında işləməyə başlayacaqlar. Ancaq bununla bərabər, onu da bildirməliyəm ki, bizə xor baxanlar, torpağımıza göz dikənlər, uğurumuzu həzm edə bilməyənlər heç vaxt, heç vaxt unutmasınlar ki, “dəmir yumruq” yerindədir və hər zaman yerində olacaq! Heç kim bizimlə diktat və ultimatum dilində danışa bilməz! Bunu heç kim unutmasın! Onu da unutmasın ki, Qarabağ Azərbaycandır!”