TBİLİSİDƏ ŞƏHİDLƏRİMİZİN XATİRƏSİNƏ HƏSR EDİLMİŞ MƏTBUAT KONFRANSI
Yanvarın 21-də Azərbaycanın Gürcüstandakı səfirliyində 1990-cı il yanvarın 20-də Bakıda törədilmiş qətlamın ildönümü ilə əlaqədar yerli və xarici ölkə jurnalistləri üçün mətbuat konfransı keçirilmişdir.
Mətbuat konfransı başlanmazdan əvvəl onun iştirakçıları 20 yanvar qurbanlarının - şəhidlərimizinü xatirəsini bir dəqiqəlik sükutla yad etmişlər.
Səfir Hacan Hacıyev 1990-ci il yanvarın 19-dan 20-nə keçən gecə sovet ordusunun Bakıda və Azərbaycanın bir neçə bölgəsində vəhşicəsinə və qəddarcasına törətdiyi qırğın haqqında ətraflı məlumat verdi. O bildirdi ki, sovet imperiyasının azğınlaşmış rəhbərləri bu əməlləri ilə Azərbaycan xalqının azadlıq və müstəqillik iradəsini qırmağa can atmış, lakin buna müvəffəq olmamışlar. Bir yumruq kimi birləşən Azərbaycan xalqı imperiya quldurlarının basqınlarına, top-tüfənginə qəhrəmancasına sinə gərdi və böyük qurbanlar hesabına öz müstəqilliyini bərpa etdi.
Sonra səfir dövlətimizin başçısı Heydər Əliyevin çox böyük səyləri, qətiyyəti və məqsədyönlü fəaliyyəti sayəsində ölkəmizin beynəlxalq aləmdə böyük nüfuz qazandığından, bütün mötəbər beynəlxalq təşkilatlarda layiqincə təmsil olunduğundan, respublikamızın həyatının hər bir sahəsində köklü islahatlar aparıldığından və bunun nəticəsində xalqmızın rifahının getdikcə yüksəlməsindən, habelə Azərbaycan və gürcü xalqları arasında iqtisadi, siyasi əlaqələrin, dosiluğun daim möhkəmlənməsindən danışdı.
Axırda Hacan Hacıyev jurnalistlərin suallarına cavab verdi və 20 yanvar faciəsi haqqında sənədli film nümayiş etdirildi.
Şahismayıl Məmmədov
AZƏRTAC-ın xüsusi müxbiri
Tbilisi
Bölmənin digər xəbərləri
