TBİLİSİDƏKİ AZƏRBAYCAN MƏDƏNİYYƏTİ MƏRKƏZİNİN BEŞ İLLİYİ
Azərbaycan Prezidenti Heydər Əliyevin 1996-ci ilin martında Gürcüstana ilk rəsmi səfəri zamanı Tbilisidə yaradılmış Azərbaycan mədəniyyəti mərkəzi bu günlərdə özünün beş illiyini təntənəli şəraitdə qeyd eftmişdir.
Yubiley tədbirini mərkəzin direktoru Məmməd Gülməmmədov açaraq, bu qurumun ötən illər ərzindəki fəaliyyətindən, prezident Heydər Əliyevin və Prezident Eduard Şevardnadzenin bu təşkilata qayğı və diqqətindən danışdı.
Gürcüstan Prezidentinin milli məsələlər üzrə köməkçisi Aleksey Gerasimov dövlət başçısı Eduard Şevardnadzenin Azərbaycan mədəniyyəti mərkəzinə yubileyi münasibətilə göndərdiyi təbrik məktubunu oxudu, ölkəmizin Tbilisidəki səfiri Hacan Hacıyev isə Prezident Heydər Əliyevin Gürcüstanda yaşayan soydaşlarımıza səmimi salamını və xoş arzularını yetirdi.
Gürcüstan Prezidentinin regional siyasət və ərazi idarəetmə xidməti rəisinin müavini İmir Məmmədli, deputatlardan Cansuq Çarkviani, Ramiz Bəkirov, Azər Süleymanov, Kvemo Kartli - Borçalı bölgəsinin qubernatoru Levan Mamaladze, Gürcüstan mədəniyyət nazirinin birinci müavini Svetlana Keçba və başqaları çıxış edərək bildirdilər ki, M.F.Axundovun ev muzeyinin yerləşdiyi bu bina Z.Qamsaxurdianın hakimiyyəti dövründə azərbaycanlıların əlindən alınmışdı, lakin cənab Heydər Əliyev və cənab Eduard Şevardnadze hakimiyyətə qayıtdıqdan sonra məhz onların təkidi ilə həmin bina yenidən soydaşlarımıza verildi, orada həm də Azərbaycan mədəniyyəti mərkəzi açıldı. Natiqlər həmçinin bildirdilər ki, Şəmkir rayon rəhbərliyi bu mərkəzin lazımi avadanlıqla təmin olunması və işçilərin əmək haqqı alması üçün yardımını əsirgəmir.
Yubiley tədbiri saz-söz ustalarının konserti ilə başa çatdı.
Şahismayıl Məmmədov
AZƏRTAC-ın xüsusi müxbiri
Tbilisi
Bölmənin digər xəbərləri
