TBİLİSİDƏKİ HƏBSXANADA QİYAM ZAMANI HƏLAK OLANLARDAN BİRİ AZƏRBAYCANLIDIR

28.03.2006 [22:49]
Çap et
A⁺ A^-

AZƏRTAC-ın xüsusi müxbiri xəbər verir ki, Tbilisinin Ortacala məhəlləsindəki 5 nömrəli həbsxanada martın 27-də törədilmiş qiyam tamamilə yatırılmış və xüsusi təyinatlı polis qüvvələri həbsxananın ərazisini tərk etmişlər. Rəsmi məlumata görə, qiyam yatırılarkən 7 məhbus həlak olmuş, 19 nəfər yaralanmışdır. Hələlik ölənlərdən yalnız ikisinin - Zakir Bayramov və Qoqa Yaşinin soyadları açıqlanmışdır.

Gürcüstan Prezidenti Mixail Saakaşvili həbsxanada baş verən qiyamla əlaqədar Milli Təhlükəsizlik Şurasının iclasını çağırmış, hüquq mühafizəçilərinə əməliyyat zamanı əsil peşəkarlıq göstərdiklərinə və qısa müddətdə qiyamı yatırıb ölkəni ciddi təhlükədən xilas etdiklərinə görə təşəkkürünü bildirmişdir. Prezident qiyam yatırılmasaydı, ağır cinayətlərə görə həbsə alınmış 4 minədək məhbusun şəhərə dağılıb neçə təhlükələr törədə biləcəklərini vurğulamışdır.

Gürcüstan Ədliyyə Nazirliyi cəzaçəkmə departamentinin rəisi Baço Axalaya jurnalistlərə müsahibəsində bildirmişdir ki, 5 nömrəli həbsxanada qiyamın qarşısı vaxtında alınmasaydı, 14 həbsxanada da qiyam başlayacaqdı.

Hazırda Ortacala həbsxanasındakı 3700 məhbus başqa həbsxanalara köçürülür.