CƏMİYYƏT
TƏDBİRLƏR PLANI HAZIRLANMIŞDIR
Gənclər, İdman və Turizm Nazirliyində Gənclər gününün bayram edilməsi üzrə tədbirlər planı hazırlamışdır. Gənclər günü Azərbaycan Prezidenti Heydər Əliyevin Sərəncamı ilə fevralın 2-də qeyd olunur. Nazirliyin mətbuat mərkəzində AZƏRTAC-ın müxbirinə bildirmişlər ki, yanvarın 31-də “Azərbaycan gəncləri: forumdan foruma” mövzusunda “dəyirmi masa” keçiriləcəkdir. Tədbirdə nazir Əbülfəz Qarayev, gənclər və uşaq təşkilatlarının, beynəlxalq gənclər strukturlarının rəhbərləri, idmançılar iştirak edəcəklər. Fevralın 1-də Vəcihə Səmədova adına sərgi salonunda gənc rəssamların əsərlərindən ibarət sərgi açılacaqdır. Ertəsi gün respublika velotrekində peşəkar və həvəskar idmançıların iştirakı ilə velomotomarafon keçiriləcəkdir. Elə həmin gün nazirliyin, gənclər və uşaq təşkilatlarının rəhbərləri “Şəhidlər xiyabanı” ziyarət edəcəklər. Şəhriyar adına Mədəniyyət Mərkəzində gənc ifaçıların konserti və gənc yazıçılara mükafatların təqdim olunması mərasimi, Milli parkda isə uşaqlar arasında skeytbord üzrə yarışlar keçiriləcəkdir.
Gənclərin 3-cü forumuna genişmiqyaslı hazırlıq dörd mərhələdə keçiriləcək və fevralın 18-dən mayın 3-dək davam edəcəkdir. İlk üç mərhələdə rayon və şəhər səviyyələrində tədbirlər keçiriləcək, mayın 3-də isə Respublika sarayında Forumun ümumi iclaslarına yekun vurulacaqdır. Mətbuat mərkəzində onu da bildirmişlər ki, respublika forumuna beynəlxalq status verilməsi üçün tədbirlər görülür.