TEHRANDA SƏFİƏDDİN URMƏVİYƏ HƏSR OLUNMUŞ BEYNƏLXALQ KONFRANS KEÇİRİLMİŞDİR
Ölkəmizin İrandakı səfirliyindən AZƏRTAC-a bildirmişlər ki, bu yaxınlarda Tehranda XIII əsrdə yaşayıb-yaratmış, böyük Azərbaycan alimi, Şərq musiqisinin inkişafında xüsusi xidmətləri olan Səfiəddin Urməviyə həsr edilmiş beynəlxalq konfrans keçirilmişdir.
İran hökumətinin dəstəyi və Milli Sənət Akademiyasının təşkilatçılığı ilə keçirilən konfransın açılışında İran, ABŞ, Türkiyə, Fransa, Azərbaycan, Tunis, Tacikistan, Livan və Suriyanın alimləri, habelə İranın dövlət xadimləri, elm, ictimaiyyət nümayəndələri, Tehranda akkreditə olunmuş diplomatlar, o cümlədən, respublikamızın səfiri Abbasəli Həsənov iştirak etmişlər. İran İslam Respublikasının Prezidenti Seyid Məhəmməd Xatəmi konfrans iştirakçılarına təbrik göndərmişdir.
Üç gün davam edən konfransda ölkəmizin təmsilçiləri - əməkdar incəsənət xadimi, sənətşünaslıq doktoru, professor Zemfira Səfərovanın “Səfiəddin Urməvinin “Kitab əl-Ədvar” risaləsi ilə Üzeyir Hacıbəyovun “Azərbaycan xalq musiqisinin əsasları” kitabının müqayisəli təhlili” və sənətşünaslıq namizədi Sənubər Bağırovanın “XVIII əsr naməlum Azərbaycan müəllifinin “Ədvar” risaləsi” mövzusunda məruzələri maraqla qarşılanmışdır.
Konfransdan sonra iştirakçılar S.Urməvinin vətəni, İranın Urmiyə şəhərinə gəlmiş, tədbirin bədii hissəsi burada bir neçə gün davam etmişdir. “Bayatı-Şiraz” muğamının ifası ilə konfrans iştirakçılarını heyran qoyan azərbaycanlı tarzən Malik Mənsurov fransız alimi Jan Dürinqin məruzəsini də tarda müşayiət etmişdir.
Bölmənin digər xəbərləri
