TƏLƏBƏ QƏBULU ÜZRƏ DÖVLƏT KOMİSSİYASINDA NÖVBƏTİ MƏTBUAT KONFRANSI OLMUŞDUR
AZƏRTAC xəbər verir ki, Tələbə Qəbulu üzrə Dövlət Komissiyasında (TQDK) kütləvi informasiya vasitələrinin nümayəndələri üçün mətbuat konfransı keçirilmişdir.
TQDK-nın sədri Məleykə Abbaszadə bildirmişdir ki, rəhbərlik etdiyi qurum iyunun 29-da 2008-2009-cu tədris ili üçün Azərbaycan Respublikası ali məktəblərinə və orta təhsil bazasından (11 illik) orta ixtisas təhsili müəssisələrinə III ixtisas qrupu üzrə qəbul imtahanı keçirəcəkdir.
Bu il III ixtisas qrupu üzrə nəzərdə tutulmuş 9 min 52 yerə 40 min 552 abituriyent ərizə vermişdir. Onlardan 36 min 783 nəfəri Azərbaycan bölməsinin, 3 min 769 nəfəri isə rus bölməsinin məzunudur (ötən il Azərbaycan bölməsində 37 min 40 nəfər, rus bölməsində 3 min 69 nəfər olmuşdur). Qeyd edilən ixtisas qrupu üzrə təhsil almaq istəyən 227 abituriyent xarici ölkə vətəndaşıdır.
Qəbul imtahanı Bakı, Naxçıvan və Sumqayıt şəhərlərində keçiriləcəkdir.
Müvafiq ixtisas qrupunda 73 ixtisas üzrə 18 dövlət və 13 özəl ali təhsil müəssisəsində mütəxəssis hazırlığı aparılır.
M.Abbaszadə iyulun 3-də III ixtisas qrupu üzrə test imtahanının nəticələrinin açıqlanacağını və TQDK-nın internet saytında veriləcəyini də diqqətə çatdırmışdır.
Sonra TQDK-nın sədri jurnalistləri maraqlandıran suallara cavab vermişdir.
Bölmənin digər xəbərləri
