ELM VƏ TƏHSİL
TƏLƏBƏ QƏBULU ÜZRƏ DÖVLƏT KOMİSSİYASININ MƏLUMATI
Tələbə Qəbulu üzrə Dövlət Komissiyası (TQDK) bildirir ki, 2002/2003-cü tədris ili üçün respublikanın ali məktəblərinə qəbul olanların siyahısı avqustun 5-də ”Abituriyent” jurnalının 7-ci nömrəsində dərc olunmuş və TQDK-nın internet saytında yerləşdirilmişdir.
Ali məktəblərin ümumi 27577 plan yerinə 14981 abituriyent, o cümlədən dövlət ali məktəblərinin 24458 plan yerinə 14345 abituriyent, özəl ali məktəblərin 3119 plan yerinə 636 abituriyent yerləşdirilmişdir. Qəbul qaydalarının 9-cu bəndinə əsasən, ali məktəblərin bütün şöbələrinə /əyani, axşam, qiyabi/ qəbul edilən abituriyentlər avqustun 15-dək sənədlərini daxil olduqları təhsil müəssisəsinə təqdim etməli, TQDK-nın ali məktəblərə göndərdiyi qəbul olunanların siyahısında mütləq imza etməklə qeydiyyatdan keçməlidirlər. Həmin müddətdə qeydiyyatdan keçməyən abituriyentlər ali məktəbə qəbul olunanlar sırasından xaric ediləcək və onların qəbul haqqında əmrləri ali məktəbə göndərilməyəcəkdir.
Ali məktəblərə qəbul olmayan abituriyentlər öz imtahan nəticələri haqqında TQDK-nın arayışını sənədlərini bilavasitə təqdim etdikləri sənəd qəbulu komissiyalarından ala bilərlər. Arayışda hər bir imtahan fənnindən etalon cavabların siyahısı, abituriyentin fənlər üzrə düzgün və yanlış cavabları, nisbi balları, habelə seçdiyi ixtisasların aid olduğu altqruplar üzrə topladığı ballar və həmin ixtisaslar üzrə minimum keçid balları haqqında məlumatlar göstərilmişdir. Arayışlar abituriyentlərə pulsuz verilir.
Abituriyentlərin nəzərinə çatdırılır ki, bu arayışdakı göstəricilərdə onların ali məktəbə qəbul olunmamasının səbəbləri tam açıqlanmışdır. Abituriyentlərin həmin göstəricilərlə, sadəcə, diqqətlə tanış olmağı vacibdir.
TQDK tərəfindən təşkil olunmuş apellyasiya komissiyaları şənbə və bazar günləri də daxil olmaqla, avqustun 8-dən 12-dək hər gün saat 9-dan 18-dək fəaliyyət göstərəcəkdir. Apellyasiya komissiyalarının test metodikası şöbəsinin işçilərindən və mütəxəssis müəllimlərdən ibarət işçi qrupları abituriyentlərə testlərin məzmunu və imtahan nəticələri haqqında izahat verəcəkdir. Apellyasiya komissiyalarına müraciət edən abituriyentlər öz imtahan nəticələri barədə tam və dürüst məlumat ala bilərlər. Apellyasiya komissiyaları qruplar üzrə aşağıdakı ünvanlarda təşkil olunmuşdur:
AZƏRBAYCAN BÖLMƏSİ:
I qrup - Azərbaycan Dövlət IV qrup - Nərimanov r-nu,
İqtisad Universiteti, 4-cü 47 saylı məktəb (Azadlıq
korpus (Abbas Səhhət prospekti, 139);
küçəsi, 45 a); V qrup - Nərimanov r-nu,
II qrup - Nərimanov r-nu, 258 saylı məktəb (S.Rəhman
36 saylı məktəb (Ak.H.Əliyev küçəsi, 34).
küçəsi, 45);
III qrup - Nəsimi r-nu, 42 saylı
məktəb (MirQasımov
küçəsi, 6);
RUS BÖLMƏSİ:
Bütün qruplar - TQDK-nın binası (Ak. H.Əliyev küçəsi, 17)
Eyni zamanda, TQDK abituriyentlərin nəzərinə çatdırır ki, apellyasiya komissiyalarında ərizə formasının və cavab kartının doldurulmasında, imtahanın texnoloji tələblərinin yerinə yetirilməsində səhvlərə yol verənlərin, habelə, hər hansı səbəblərdən imtahanda iştirak etməyənlərin, “Abituriyentin yaddaş kitabçası”nda qeyd edilmiş davranış qaydalarını pozanların müraciətlərinə baxılmır. Abituriyent apellyasiya komissiyasına şəxsən gəlməlidir. Apellyasiyada iştirak etmək üçün şəxsiyyət vəsiqəsi təqdim olunmalıdır. Apellyasiyaya abituriyentin qohumu, dostu, tanışı və başqa şəxslər buraxılmır. Ali məktəblərə qəbul qaydalarının 11-ci bəndinə əsasən, bir ali məktəbdən başqasına köçürülmək, təhsil formasını və ya ixtisasını dəyişdirmək və təhsil haqqının ödənilməsi ilə bağlı müraciətlərə baxılmır. Apellyasiya müddəti başa çatdıqdan sonra imtahanlarla bağlı heç bir şikayətə baxılmır.