“Təmiz Şəhər” ASC ekoloji mövzuda inşa müsabiqəsi elan edir
Bakı, 15 aprel (AZƏRTAC). Ətraf mühitin mühafizəsinə və tullantıların düzgün idarə olunmasına uşaqların və yeniyetmələrin diqqətini yönəltmək üçün “Təmiz Şəhər” ASC məktəblilər arasında inşa yazı müsabiqəsi elan edir.
ASC-nin mətbuat xidmətindən AZƏRTAC-a bildirmişlər ki, inşa müsabiqəsinin keçirilməsində əsas məqsəd şagirdləri ekoloji mövzuda düşündürmək və onların fikirlərini öyrənməkdir.
Müsabiqəyə təqdim olunacaq inşa yazıları “Tullantıları necə azaltmalıyıq?”, “Ətrafı təmiz saxlamaq üçün nə etməliyik?”, “Tullantı nədir və onun faydaları hansılardır?” mövzularını özündə əks etdirməlidir.
İnşa yazıları mayın 15-dək [email protected] ünvanına göndərilməlidir. Ətraf mühitin qorunması məqsədi ilə kağız üzərində yazılmış inşalar qəbul olunmayacaqdır.
Yazılar münsiflər heyəti tərəfindən qiymətləndiriləcəkdir. Müsabiqənin nəticələri üzrə keçiriləcək təqdimat mərasimində hər mövzu üzrə birinci üç yerin qalibləri noutbuk, planşet və elekron kitablar kimi dəyərli hədiyyələrlə mükafatlandırılacaq, inşa müsabiqəsinin bütün iştirakçıları diplomlarla təltif ediləcəklər.
Bölmənin digər xəbərləri
