“Tengiz” yatağında neft hasilatı bərpa olunub
Astana, 31 yanvar, AZƏRTAC
Qazaxıstanda yerləşən “Tengiz” yatağında istehsal əməliyyatları yenidən başlayıb.
AZƏRTAC Qazaxıstan Respublikası Energetika Nazirliyinə istinadla xəbər verir ki, bu gün ilk quyu (GZU-52) uğurla istismara verilib. Texnoloji qurğular (PBF obyekti) işə salınıb və hazırda normal rejimdə fəaliyyət göstərir.
Hazırda 5 quyu artıq istismara verilib. “Tengizşevroyl” şirkətinin texniki xidmətləri növbəti GZU-53 qrup halında ölçmə qurğusunun işə salınmasına hazırlıq işləri aparır. Hasilat həcmləri sistem parametrləri sabitləşdikcə və proseslərin tam təhlükəsizliyi təmin olunduqca mərhələli şəkildə artırılacaq.
Bundan əvvəl yanvarın 26-da ikinci nəsil zavod (ZVN) da uğurla işə salınıb. Zavodun fəaliyyəti artıq işlək vəziyyətdə olan Kral yatağından daxil olan xammal hesabına təmin edilir.
Qazaxıstan Respublikası Energetika Nazirliyi və “KazMunayQaz” Milli Şirkəti operatora layihənin planlaşdırılan gücə daha tez çıxması üçün hərtərəfli dəstək göstərir. Bərpa işlərinin birbaşa istehsal sahələrində koordinasiyası üçün energetika nazirinin müavini Kayırxan Tutkışbayev hazırda obyektlərdədir.
Xatırladaq ki, yanvar ayında Atırau vilayətində yerləşən iri neft yataqları olan “Tengiz” və “Kral” yataqlarında hasilat dayandırılmışdı. Bu qərar, sənaye müəssisələrində bəzi enerji paylama sistemlərinə təsir edən yaranmış vəziyyətlə əlaqədar olaraq qəbul edilib.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
