REGİONLAR
Tərtərdə tədbir: Ulu Öndər Heydər Əliyevin irsi milli sərvətimizdir
![](/files/galleryphoto/2023/2/1200x630/168426451479718458_1200x630.jpg)
![](/files/galleryphoto/2023/2/1200x630/1684264514643753657_1200x630.jpg)
![](/files/galleryphoto/2023/2/1200x630/16842645144600118935_1200x630.jpg)
Tərtər, 16 may, AZƏRTAC
Tərtərdə Ümummilli Lider Heydər Əliyevin 100 illik yubileyinə həsr olunmuş “Ulu Öndər Heydər Əliyevin irsi milli sərvətimizdir” mövzusunda tədbir keçirilib.
AZƏRTAC-ın bölgə müxbiri xəbər verir ki, Tərtər Rayon İcra Hakimiyyətinin və təhsil sektorunun təşkilatçılığı ilə keçirilən tədbirdə əvvəlcə Ulu Öndərin abidəsi ziyarət edilib, önünə gül dəstələri düzülüb. Tədbir Ümummilli Liderin və torpaqlarımızın ərazi bütövlüyü uğrunda həlak olmuş şəhidlərin xatirəsinin bir dəqiqəlik sükutla yad edilməsi ilə başlayıb.
Tərtər Rayon İcra Hakimiyyətinin İctimai-siyasi və humanitar məsələlər şöbəsinin müdir müavini Zabil Paşayev çıxış edərək, Ulu Öndər Heydər Əliyevin 100 illiyi münasibəti ilə keçirilən tədbirlər haqqında iştirakçılara məlumat verib, Ümummilli Liderin xalqımız və dövlətimiz qarşısında xidmətlərindən danışıb. Bildirib ki, Ulu Öndər Heydər Əliyev böyük qətiyyəti, siyasi iradəsi ilə xilaskarlıq missiyasını yerinə yetirdi, yeni, müasir Azərbaycanı qurdu. O, “Mənim üçün hər şeydən əziz mənim xalqımdır, mənim Vətənimdir, mənim torpağımdır” fikirləri ilə xalqına, dövlətinə bağlılığını ifadə etməklə yanaşı, Azərbaycanın bir dövlət olaraq dünyada tanınmasını, yeri və rolunun möhkəmlənməsini yeganə həyat amalı seçdiyini diqqətə çatdırırdı. Ulu Öndərin Azərbaycanın dövlət müstəqilliyini tarixi nailiyyətimiz kimi dəyərləndirərək, onun qorunmasını və möhkəmləndirilməsini hər bir vətənpərvər insanın qarşısında mühüm vəzifə kimi qoyması da bu hisslərinin böyüklüyündən irəli gəlirdi. Heydər Əliyevin düşünülmüş və məqsədyönlü siyasəti nəticəsində istər ikitərəfli, istərsə də beynəlxalq təşkilatlar çərçivəsində münasibətlərin yüksək səviyyədə qurulması, ən əsas bir dövlətin xaricdə varlığı kimi dəyərləndirilən diaspor quruculuğuna xüsusi diqqət göstərilməsi Azərbaycan həqiqətlərinin, tarixinin dünya ictimaiyyətinə çatdırılmasında əhəmiyyətli rol oynadı. Dahi şəxsiyyət harada yaşamasından asılı olmayaraq bütün azərbaycanlılardan bir amal-azərbaycançılıq ideyası ətrafında sıx birləşməyi tələb edirdi. O, dünya azərbaycanlılarının təşkilatlanması və onların bir Vətən - müstəqil Azərbaycan ətrafında sıx birləşməsi üçün daim və əzmlə səy göstərmiş, bu istiqamətdə son dərəcə qiymətli qərarlar qəbul etmişdir.
Təhsil sektorunun metodisti Müsaməddin Qurbanov, şəhər 2 nömrəli məktəb-liseyin direktoru Gülarə Əkbərova, 5 nömrəli tam orta məktəbin direktoru Arzu Nəcəfova, 6 nömrəli tam orta məktəbin direktoru Rüfət İsmayılov və başqaları çıxış edərək Ulu Öndər Heydər Əliyevin siyasi fəaliyyətindən, Dahi Rəhbərin fədakar əməyi, qətiyyəti, möhkəm siyasi iradəsi sayəsində müasir Azərbaycan dövlətçiliyinin siyasi, iqtisadi əsaslarının yaradılmasından, respublikamızın dünya məkanında öz layiqli yerini tutmasından, ölkəmizin bütün sahələrində baş vermiş müsbət dəyişikliklərdən söhbət açıblar. Vurğulanıb ki, müstəqil Azərbaycanın qazandığı bütün müvəffəqiyyətlər Ümummilli Lider Heydər Əliyevin uğurlu və uzaqgörən siyasətinin nəticəsidir. Ulu Öndər Heydər Əliyevin irsi milli sərvətimizdir.