TEYMUR RƏCƏBOV NORVEÇLİ VUNDERKİNDƏ MƏĞLUB OLMUŞDUR

Bakı, 3 oktyabr (AZƏRTAC). Çinin Nantszin şəhərində dairəvi sistem üzrə keçirilən superturnirin beşinci turuna yekun vurulmuşdur.

Azərbaycan şahmatçısı Teymur Rəcəbov bu tur çərçivəsində norveçli vunderkind Maqnus Karlsenlə görüşərək, 25-ci gedişdə rəqibinə məğlub olmuşdur.

V.Topalov (Bolqarıstan)-Van Yu (Çin) və P.Leko (Macarıstan)-D.Yakovenko (Rusiya) qarşılaşmaları isə heç-heçə nəticələnmişdir.

Beş oyundan sonra turnir cədvəlinə liderlik edən M.Karlsen 4,5, Van Yu 2,5, T.Rəcəbov, D.Yakovenko, P.Leko və V.Topalov 2 xala malikdir.

Oktyabrın 4-də keçiriləcək altıncı turda T.Rəcəbov-Van Yu, P.Leko-M.Karlsen, D.Yakovenko-V.Topalov qarşılaşacaqlar.

Turnirin ümumi mükafat fondu 250 min avrodur. Yarışın qalibini 80 min avro mükafat gözləyir.

MÜƏLLİFLƏ ƏLAQƏ