“TotalEnergies” Rusiyadakı LNG layihəsindən çıxıb
Bakı, 27 avqust, AZƏRTAC
Fransa enerji nəhəngi “TotalEnergies” şirkəti Rusiyadakı “Arctic LNG 2” layihəsindəki bütün 10 faizlik payını “Novatek” şirkətinin törəməsi olan “NordLine”a ötürdüyünü açıqlayıb.
AZƏRTAC xəbər verir ki, bununla da “TotalEnergies”in Gıdan yarımadasındakı layihə ilə heç bir tərəfdaşlıq əlaqəsi qalmayıb.
Şirkətdən bildirilib ki, bu qərar 2026-cı ilin ikinci rüb maliyyə nəticələri hesabatında öz əksini tapıb.
Razılaşmaya əsasən, “TotalEnergies” layihəyə əvvəllər verilmiş səhmdar kreditlərindən irəli gələn təxminən 1,3 milyard dolları geri ödəmək hüququnu özündə saxlayacaq. Şirkət vurğulayıb ki, bu yığım gələcəkdə beynəlxalq sanksiyaların icazə verdiyi dərəcədə və hüquqi qaydalara uyğun olaraq həyata keçirilə bilər.
“Novatek”in rəhbərlik etdiyi layihə 2023-cü ilin noyabr ayından bəri ABŞ-nin sanksiyalarının hədəfindədir.
Rusiyanın ən böyük mayeləşdirilmiş təbii qaz (LNG) investisiyalarından biri olan “Arctic LNG 2” layihəsində bu pay transferindən sonra “Novatek”in payı 70 faizə qədər artıb. Layihədə Çinin CNPC və CNOOC şirkətləri və Yaponiyanın “Arctic LNG” konsorsiumu isə hər biri 10 faizlik paya malikdir.
Bölmənin digər xəbərləri
