TRASEKA HÖKUMƏTLƏRARASI KOMİSSİYASININ 2015-Cİ İLƏDƏK İNKİŞAF STRATEGİYASININ ƏSAS MÜDDƏALARI HAZIRLANMIŞDIR
İclasda TRASEKA Hökumətlərarası Komissiyasının Azərbaycan üzrə milli katibi Akif Mustafayev iştirak etmişdir. O, AZƏRTAC-a bildirmişdir ki, tərəflər bu proqramın qarşıdakı on il üçün inkişaf strategiyası ilə bağlı rəy və təkliflərini bildirmişlər. Müzakirə edilən məsələ ilə bağlı əsas müddəalar müəyyən edilmiş və razılaşdırılmışdır. 2006-cı il yanvar ayının ortalarınadək proqramın üzvü olan hər bir ölkə bu müddəaları hökumətlə, əlaqədar nazirliklərlə razılaşdırmalıdır.
Fevral ayının birinci ongünlüyündə Rumıniyada bu proqram üzrə milli katiblərin yenidən görüşü olacaqdır. İnkişaf strategiyası barədə sənəd orada tam hazırlanacaqdır.
İclasda, həmçinin TRASEKA proqramına qoşulan ölkələrin Xarici İşlər nazirliklərinin beynəlxalq hüquq üzrə ekspertlərinin iştirakı ilə protokol qəbul edilmişdir. Bu protokolda TRASEKA Hökumətlərarası Komissiyasına müşahidəçi qismində üzv olmaq prosedurları ilə bağlı təkliflər verilmişdir.
İnkişaf strategiyası barədə sənədin son müzakirəsi 2006-cı il fevralın 10-da Buxarestdə keçiriləcəkdir.
Aprel ayında isə TRASEKA-nın Sofiya şəhərində Hökumətlərarası V Konfransında inkişaf strategiyası barədə sənəd qəbul ediləcəkdir.
