TRT “MOLLA NƏSRƏDDİN” JURNALI HAQQINDA VERİLİŞ VERƏCƏK
TRT-nin Bakı təmsilçiliyindən AZƏRTAC-a bildirmişlər ki, bu veriliş Azərbaycan mətbuatında və mədəni həyatında silinməz iz qoymuş “Molla Nəsrəddin” jurnalına həsr olunmuşdur.
Tamaşaçılara məlumat veriləcəkdir ki, 1906-cı ildən nəşr olunmağa başlamış və fasilələrlə 25 il öz səhifələrində xalqın problemlərindən, dərdlərindən, Şərqdəki totalitar rejimdən, Qərbdəki imperialist dairələrdən söz açmış bu jurnal nəinki Azərbaycanda, bütün İslam dünyasında bir yenilik idi. Araşdırmalar zamanı üzə çıxmış poçt qeydiyyatları jurnalın Qahirədə, İstanbulda, Parisdə, Moskvada, Daşkənddə də oxucularının olmasını sübut etmişdir.
Akademiklər Bəkir Nəbiyev, İsa Həbibbəyli, C.Məmmədquluzadənin ev-muzeyinin direktoru Pərixanım Mahmudqızı verilişin qonağı olacaq, “Molla Nəsrəddin” jurnalı ilə bağlı maraqlı məqamlara toxunacaq, C.Məmmədquluzadə, Ö.F.Nemanzadə, Ü.Hacıbəyli, M.Ə.Sabir kimi böyük qələm sahiblərini bir araya gətirən jurnalın xalqımızın həyatındakı böyük və əhəmiyyətli rolundan danışacaqlar.
Proqram martın 31-də Bakı vaxtı ilə saat 08.00 və 01.45-də TRT-İNT, həmin gün saat 23.45-də isə TRT-TÜRK kanalında göstəriləcəkdir.
Bölmənin digər xəbərləri
