“Tullantı mərkəzi”ndə yenidənqurma işləri davam edir
Bakı, 14 sentyabr (AZƏRTAC). Ötən ilin dekabr ayından başlayaraq ARDNŞ-in Ekologiya İdarəsinin Qaradağ rayonu, Axtarma dağının yaxınlığında yerləşən “Tullantı mərkəzi”ndə tullantıların qəbulu və yerləşdirilməsi davam etdirilir.
AZƏRTAC xəbər verir ki, mərkəzin sahəsi genişləndirilmiş, açıq havada saxlanılması mümkün olan işlənmiş şinlər, plastik tullantılar, boya qabları və digər tullantıların müvəqqəti yerləşdirilməsi üçün ayrılmış sahə hamarlanaraq çınqıl qatı ilə örtülmüşdür.
“Tullantı mərkəzinin yenidən qurulması” layihəsinə uyğun olaraq qazma şlamının yerləşdirilməsi məqsədi ilə həcmi 24 min kubmetr və 8 min 700 kubmetr olan 2 tullantı ərazisi rekonstruksiya olunaraq içərisinə geomembran sərilmiş, germetikliyi xüsusi sınaq proseduru əsasında yoxlanılmışdır.
Gələcəkdə “Tullantı mərkəzi”ndə istehsalat tullantıları üçün müxtəlif texnoloji proseslərə malik emal, tullantıların zərərsizləşdirməsi qurğularının və avadanlığın quraşdırılması da nəzərdə tutulur.
Yerinə yetirilən işlərin aparılmasında əsas məqsəd ARDNŞ-in strukturlarında istehsalat prosesi zamanı formalaşan istehsalat tullantılarının və qazma şlamının idarə olunmasının müasir tələblərə uyğun həyata keçirilməsidir.
Bölmənin digər xəbərləri
