“TÜRK CÜMHURİYYƏTLƏRİ KİNO TARİXİ” ÜÇCİLDLİYİNİN TƏQDİMATI
Fevralın 15-də Azərbaycan Kinematoqrafçılar İttifaqında kinorejissor, hazırda Türkiyənin Memar Sinan Universitetində işləyən professoru, Tofiq İsmayılovun “Türk Cümhuriyyətləri kino tarixi” üçcildliyinin təqdimat mərasimi olmuşdur. İstanbulda Türk Gözəl Sənətlər Vəqfi tərəfindən nəfis şəkildə buraxılmış bu üçcildliyin birinci cildi Azərbaycan kinosu tarixinə həsr edilmişdir. İkinci və üçüncü cildlərdə isə Türkiyənin və digər türkdilli ölkələrin kino sənəti tarixindən bəhs edilir.
Kinematoqrafçılar İttifaqının Yazıçılar Birliyi və Mədəniyyət və İncəsənət Universiteti ilə birgə keçirdiyi təqdimat mərasimini giriş sözü ilə Yazıçılar Birliyinin sədri, Milli Məclisin deputatı Anar açdı.
Azərbaycan Kinematoqrafçılar İttifaqının birinci katibi, respublikanın xalq artisti Rasim Balayev, mədəniyyət naziri Polad Bülbüloğlu, Mədəniyyət və İncəsənət Universitetinin rektoru, professor Timurçin Əfəndiyev, İstanbul Böyükşəhər Bələdiyyəsi mədəniyyət işləri idarəsinin başçısı Şenol Dəmiröz, professor Gülrux Əlibəyli, AMEA-nın müxbir üzvü, Milli Məclisin deputatı Nizami Cəfərov və başqaları çıxış edərək, türk dövlətləri kino tarixinin tədqiqinə həsr olunmuş üçcildliyi mühüm tədqiqat əsəri kimi yüksək qiymətləndirdilər, onun məziyyətlərindən danışdılar.
Professor Tofiq İsmayılov mərasimə toplaşanlara dərin təşəkkürünü bildirdi, gələcək yaradıcılıq planlarından danışdı.
Təqdimat mərasimi Tofiq İsmayılovun xalq artisti Əminə Dilbaziyə həsr etdiyi “Prima” sənədli filminin nümayişi ilə başa çatdı.
Bölmənin digər xəbərləri
